සටහන – රුවන් නෙළුගොල්ල
කොහුවල පොලිස් වසමේ කළුබෝවිල, දෙහිවල ප්‍රදේශයේ පිහිටි නිවසකට ඊයේ (09) රාත්‍රියේදී අත්බෝම්බ ප්‍රහාරයක් එල්ල වී තිබේ.
ඊයේ රාත්‍රී 11.45ට පමණ යතුරුපැදියකින් පැමිණි නාඳුනන පුද්ගලයින් දෙදෙනෙකු විසින් අදාළ නිවසේ ගේට්ටුවෙන් ඇතුළට අත්බෝම්බයක් දමාගසා පළාගොස් ඇත.
එහිදී බෝම්බය පුපුරායාමෙන් නිවසේ ඉදිරිපස ජනෙල් දෙකකට සහ විදුරුවලට හානි සිදුව ඇති අතර, ජීවිත හානි කිසිවක් සිදුව නොමැත. මේ සිදුවීම සිදුවන විට එම නිවසේ සිට ඇත්තේ 56 හැවිරිදි කාන්තාවක් පමණි.
මෙම අත්බෝම්බ ප්‍රහාරය එල්ල වී ඇත්තේ මහා පරිමාණ මත්ද්‍රව්‍ය ජාවාරම්කරුවෙකු වන දිසානායක මුදියාන්සේලාගේ අවිෂ්ක ඒෂාන් යන අයගේ මිතුරෙකු වන තරිදු රවිෂාන් යන අයගේ නිවසට බවත් ඔහු මත්ද්‍රව්‍ය ජාවාරම්කරුගේ අනුගාමිකයන් සමග සමීප සම්බන්ධතා පවත්වන පුද්ගලයෙකු යැයි අනාවරණය වී ඇති බවත් පොලීසිය පවසයි.
සිද්ධිය සම්බන්ධයෙන් කොහුවල පොලීසිය වැඩිදුර විමර්ශන සිදුකරයි.
