පාසල් සිසුවියකට අමානුෂික ලෙස පහරදීම සම්බන්ධයෙන් අත් අඩංගුවට ගෙන රක්ෂිත බන්ධනාගාරගත කර සිටි පාසල් ගුරුවරියන් දෙදෙනෙකු ඇප මත නිදහස් කිරීමට මාරවිල මහේස්ත්‍රාත් අධිකරණය ඊයේ (13) නියම කර තිබේ.
මෙසේ ඇප මත නිදහස්ව ඇත්තේ වෙන්නප්පුව නගරයට ආසන්නයේ පිහිටි ප්‍රධාන පාසලක ගුරුවරියන් දෙදෙනෙකි.
මේ ගුරුවරියන් දෙදෙනාගෙන් පහරකෑමට ලක්වූ දැරිය මාසයකට වැඩි කාලයක් තිස්සේ කොළඹ ජාතික රෝහලේ දැඩි සත්කාර ඒකකයේ ප්‍රතිකාර ලබන අතර ඇයගේ තත්වය සම්බන්ධයෙන් රෝහල් බලධාරීන් කිසිවක් ප්‍රකාශ නොකළ බවයි ඇයගේ දෙමව්පියන් සඳහන් කළේ.
එම දැරියට ප්‍රතිකාර කිරීම සඳහා රුපියල් ලක්ෂ තුනක සානුකම්පිත දීමනාවක් ගෙවීමට ද මාරවිල මහේස්ත්‍රාත්වරයා සැකකාර ගුරුවරියන් දෙදෙනාට නියෝග කර ඇත.
15 හැවිරිදි එම දැරියට යම්කිසි සිදුවීමක් සම්බන්ධයෙන් එක් ගුරුවරියක් බරපතළ ලෙස පළමුව පහරදී ඇති අතර, පසුව අනෙක් ගුරුවරිය අව්වේ දණගස්වා කොස්සකින් පහරදී ඇති බව සඳහන් ය.
එහිදී අදාළ දැරිය ක්ලාන්ත වී ඇති අතර, පසුව ඇයව ඔසවාගෙනවිත් මේසයක් මත අතහැරීමේදී ඇයගේ හිස එහි වැදී ඇති බවද වාර්තා වී තිබිණි.
RN
