සටහන – නිපුනි ලියනගේ
කොළඹ (LNW): සැප්තැම්බර් 18 වැනිදා (අද) කොළඹ දී පැවැති දෙරට අතර වෙළෙඳ හා ආයෝජන රාමු ගිවිසුමේ (TIFA) 14 වැනි සභා රැස්වීමට සහභාගි වීම සඳහා ඇමරිකා එක්සත් ජනපදයේ නියෝජිතයන් 20 දෙනෙකු ශ්‍රී ලංකාවට පැමිණ ඇත.
දෙරට අතර ද්විපාර්ශ්වික සබඳතාවල 75 වැනි සංවත්සරයට සමගාමීව මෙම උත්සවය දෙරටට ම විශේෂත්වයක් විය.
ඇමරිකා එක්සත් ජනපදය ශ්‍රී ලංකාවෙහි ප්‍රධාන අපනයන ගමනාන්තයකි. තවද, ආර්ථික හා වෙළඳ සබඳතා පිළිබඳ රජයේ පුළුල් ප්‍රතිපත්තිමය ඉදිරි දැක්ම තුළ පවත්නා සහයෝගීතාව ඉහළ නංවයි. මීට ඉහත, 2002 දී ඇමරිකා එක්සත් ජනපදය සහ ශ්‍රී ලංකාව අතර අත්සන් කරන ලද TIFA හි 13 වන කවුන්සිලයේ රැස්වීමට ශ්‍රී ලංකාව සත්කාරකත්වය ලබා දුන්නේ 2019 දී ය. වසර 4 ක විරාමයකින් පසු, මෙවර සභා රැස්වීම දෙරට අතර සහයෝගීතාව වැඩිදියුණු කිරීමට තුඩු දෙන සමකාලීන වැදගත් ක්ෂේත්‍ර රාශියක් ආවරණය කර ඇත.
සීමාකාරී ආර්ථික තත්ත්වය හමුවේ, හඳුනාගත් බහුවිධ අංශයන් තුළ ආර්ථිකය සමඟ වඩාත් ඵලදායී හවුල්කාරිත්වයන් සහ සහයෝගීතාවන් ගොඩනැගීම සඳහා මෙය වේදිකාවක් බවට පත් කර ගැනීමට ශ්‍රී ලංකාව අපේක්ෂා කරන බව නිලධාරීහු පැවසූහ.
රටේ ඩිජිටල් ආර්ථිකයේ දියුණුව, මැණික් හා ස්වර්ණාභරණ කර්මාන්තය, මල් වගාවන් සහ බෝට්ටු තැනීමේ කර්මාන්තය ශ්‍රී ලංකාව එවැනි සහයෝගීතාවන් පැවැත්වීමට බලාපොරොත්තු වන අංශ කිහිපයකි. එපමණක් නොව, එක්සත් ජනපදය සතු තාක්ෂණික දියුණුව හඳුනා ගනිමින් ඊට අනුකූලව කටයුතු කිරීමට ද ශ්‍රී ලංකාව බලාපොරොත්තුවෙන් සිටී.
ශ්‍රී ලංකා නියෝජිත පිරිසේ ප්‍රධානත්වය දරනු ලබන්නේ ජාත්‍යන්තර වෙළෙඳ ප්‍රධාන සාකච්ඡාකරු කේ. වීරසිංහ විසින් වන අතර, එක්සත් ජනපද නියෝජිත පිරිස මෙහෙයවනු ලබන්නේ දකුණු සහ මධ්‍යම ආසියාවේ සහකාර එක්සත් ජනපද වෙළඳ නියෝජිත බ්‍රෙන්ඩන් ලින්ච් විසිනි.
2022 වසරේ දී එක්සත් ජනපදයට ශ්‍රී ලංකාවේ අපනයනය වාර්තාගත අයුරින් ඩොලර් බිලියන 3.3 ක් වූ අතර එය සමස්තයෙන් 25.3% කි. 2018 සහ 2022 අතර කාලසීමාව තුළ එක්සත් ජනපදයට කළ අපනයනය පසුගිය වසරේ ඩොලර් බිලියන 2.5 (2020) සහ ඩොලර් බිලියන 3.3 අතර පරාසයක පැවතුනි.
