ජාත්‍යන්තර මුල්‍ය අරමුදලේ මුල්‍ය සහන ලබා ගැනීම සඳහා ණයහිමියන්ගෙන් ලැබෙන එකඟතාවය අතිශය තීරණාත්මක බව මහබැංකු අධිපති, ආචාර්ය නන්දලාල් වීරසිංහ මහතා පවසනවා. දැනට මුල්‍ය අරමුදල සමග පවත්වන සාකච්ඡා ඉදිරියට යාමට නම් ණයහිමියන් සමග අනිවාර්යෙන් එකඟතාවයකට පැමිණීමට සිදුවන බවයි ඔහු පෙන්වා දෙන්නේ.
ණය ප්‍රතිව්‍යූහගත කිරීමට අදාලව ණයහිමියන් සමග සාකච්ඡා පවත්වමින් සිටින බවත්, ලබන සිකුරාදා වනවිට ණය ප්‍රතිව්‍යූහගත කිරීමට අදාලව ඔවුන්ගෙන් සුබවාදී ප්‍රතිචාරයක් ලැබෙනු ඇතැයි බලාපොරොත්තු වන බවත් නන්දලාල් වීරසිංහ මහතා සඳහන් කරයි.
කොළඹදී පැවති සම්මන්ත්‍රණයකට එක්වෙමින් මහබැංකු අධිපතිවරයා මෙම අදහස් පළ කළේය.
රට මුහුණ දී සිටින අර්බුදයෙන් ගොඩ ඒමට නම් පාඩු ලබන රාජ්‍ය ආයතන ප්‍රතිව්‍යූහගත කිරීම අනිවාර්ය බවත්, එවැනි තීරණයකින් හැර ආර්ථික ස්ථායීතාවය ඇතිකර ගැනීමට නොහැකි බවත් ඔහු පවසනවා. එහි ප්‍රථම පියවර ලෙස විදුලි ගාස්තු වැඩි කිරීම, ඉන්ධන මිල ස්ථාවර මට්ටමක පවත්වාගෙන යාම, බදු ආදායම් ඉහළ නැංවීම මේ වනවිටත් ක්‍රියාත්මක කර ඇති බවත්, දෙවැනි පියවර ලෙස බරපතල ලෙස පාඩු ලබන ඛනිජ තෙල් සංස්ථාව, විදුලිබල මණ්ඩලය වැනි ආයතන ප්‍රතිව්‍යූහගත කිරීම සිදුකළ යුතු බවත් නන්දලාල් වීරසිංහ මහතා පෙන්වා දෙනවා.
ආර්ථික ස්ථායීතාවය වෙනුවෙන් ගන්නා ඇතැම් තීරණ සමාජයට වේදනාත්මක වනු ඇති බවත්, කෙසේ නමුත් රටේ යහපත වෙනුවෙන් සීමිත කාලයකට හෝ ජනතාවට එම වේදනාව ඉවසීමට සිදුවන බවත් මහබැංකු අධිපතිවරයා අවධාරණය කරනවා.
UN
