කෙටි, මධ්‍යම හා දිගුකාලීන ප්‍රතිපත්ති සම්පාදනය කිරීමේදී ප්‍රමුඛතා හඳුනාගැනීම පිළිබඳ ජාතික සභා අනු කමිටුවේ සභාපතිවරයා ලෙස ශ්‍රී ලංකා පොදුජන පෙරමුණේ පාර්ලිමේන්තු මන්ත්‍රී නාමල් රාජපක්ෂ මහතා පත්කර තිබේ.
ඒ, එම අනුකමිටුව ඊයේ (07) පාර්ලිමේන්තු සංකීර්ණයේදී රැස්වූ අවස්ථාවේදී ය.
එම සභාපති ධුරය සඳහා නාමල් රාජපක්ෂ මහතාගේ නම යෝජනා කර ඇත්තේ සාගර කාරියවසම් මහතා විසින් වන අතර එය ස්ථිර කර ඇත්තේ අලි සබ්‍රි රහීම් මහතා විසිනි.
එහිදී රාජ්‍ය පරිපාලනය, සෞඛ්‍ය ප්‍රතිපත්ති, අධ්‍යාපන ප්‍රතිපත්ති, ධීවර හා ආහාර ප්‍රතිපත්ති, විදුලිබල හා බලශක්ති ප්‍රතිපත්ති, දේශගුණික විපර්යාස පිළිබඳ ප්‍රතිපත්ති සහ ව්‍යවසායකත්වය පිළිබඳ ප්‍රතිපත්ති නවීකරණය සඳහා අදහස් හා යෝජනා ලබාගැනීමට අදාළ ක්ෂේත්‍රයන්හි විශේෂඥයින් අනුකමිටුව හමුවට කැඳවීමට සියලු සාමාජිකයින් එකඟ වී තිබේ.
එමෙන්ම එම අදහස් හා යෝජනා අනුව කෙටි කාලීන යෝජනා මාසයක් ඇතුළතත්, මධ්‍යම කාලීන යෝජනා මාස දෙකක් ඇතුළතත්, දීර්ඝ කාලීන යෝජනා මාස තුනක් ඇතුළතත් ජාතික සභාව වෙත ඉදිරිපත් කිරීමටත් සාමාජිකයින් එකඟ වී ඇති බව සඳහන්.
RN
