ලංකා IOC, සයිනොපෙක් සහ ෂෙල් යන මෙරට ක්‍රියාත්මක පෞද්ගලික අංශයේ ඉන්ධන සමාගම් සමග අත්සන් තබා ඇති ගිවිසුම් ඉදිරියේදී සංශෝධනය කිරීමට පියවර ගන්නා බව ජනාධිපති අනුර කුමාර දිසානායක මහතා පවසයි.
“අද අපේ තෙල් සංස්ථාව අඩු මිලට තෙල් විකුණනවා. පුද්ගලික සමාගම් කියනවා ඒ ගානට දෙන්න බෑ කියලා. දැන් ඒකයි වෙලා තියෙන්නෙ. වෙනදා මොකද වෙලා තියෙන්නෙ ? ආණ්ඩුවේ එක ගණන්, පුද්ගලික සමාගම් ලාභයි. අද මොකද වෙලා තියෙන්නෙ ? ආණ්ඩුවේ තෙල් සංස්ථාවේ තෙල් ලාභයි. පුද්ගලික අයට ඒ ගාණට දෙන්න බෑ.
එක සමාගමක් කියනවා රුපියල් 132කින් ඩීසල් වැඩි කරන්න කියලා. තව ඒ සමාගමක් කියනවා 116කින් ඩීසල් වැඩි කරන්න කියලා. අපි වැඩි කළේ නෑ. අපි කිව්වා අපි තෙල් සංස්ථාව හරහා මේ රුපියල් 70 සහනාධාරය සහිතව රුපියල් 10කින් විතරක් ඩීසල් වැඩි කරලා අපි ජනතාවට බරක් නොදී බලාගන්නවා කියලා.
අද පෞද්ගලික සමාගම් ෂෙඩ්වල තෙල් හිඟයක් තියෙනවා. ඒගොල්ලෝ කියනවා වැඩි කරේ නැත්නම් විකුණන් නෑ කියලා. ඒකට අපි නීතිමය ක්‍රියාමාර්ග ගන්ඩ බෑ. ඒවා දෙන කොට ගහපු ගිවිසුම්වල තියෙනවා අපි හිර වෙච්ච තැන්. පරණ ගිවිසුම්. අපි ඒවා සංශෝධනය කරනවා.
ඩීසල් වෙළෙඳපොලේ තෙල් සංස්ථාවේ පංගුව තිබුණේ 58%යි. අද ඩීසල් වෙළෙඳපොලේ තෙල් සංස්ථාවේ පංගුව 77%යි. ඉතිරි 23% කරන්න කට්ටියට බැරිනම් ඒක අපිම කරන්නම්. මතක තබා ගන්න. අපි ඒ ගොල්ලන්ට දැනුම් දීලා තියෙනවා. ඕන්නම් ඕගොල්ලෝ කියන ගානට විකුණන්න, අපි අපේ ගානට විකුණනවා. එච්චරයි. වෙන උත්තර නෑ මේවට”
ජනාධිපතිවරයා මේ බව පැවසුවේ ඊයේ (11) ඉබ්බාගමුවේදී පැවති “අපේ ආණ්ඩුව වසර දෙකයි රටට සුබයි” ජන රැලිය අමතමිනි.
