රෂිකා හෙන්නායක ඔක්තෝබර් 30, කොළඹ LNW :
කඩුගන්නාව නගර සභා සභාපතිවරයා විසින් සිදු කළ බව කියන පහරදීමක් හේතුවෙන් පුද්ගලයෙකු රෝහල්ගත කර තිබේ.
පොලිසිය පවසන පරිදි, මෙම සිදුවීම කඩුගන්නාව, ඉලුක්වත්ත ප්‍රදේශයේදී සිදුව ඇත්තේ තක්සේරු බදු සම්බන්ධයෙන් ඇති වූ ආරවුලක් හේතුවෙනි. පහරදීමට ලක්වූ පුද්ගලයා 45 හැවිරිදි මෝටර් රථ අලුත්වැඩියා මධ්‍යස්ථානයක (ගරාජයක) හිමිකරුවෙකි.
ඔහු මුලින් කඩුගන්නාව රෝහලට ඇතුළත් කර ඇති අතර, පසුව වැඩිදුර ප්‍රතිකාර සඳහා පේරාදෙණිය රෝහලටත්, ඉන් අනතුරුව මහනුවර ජාතික රෝහලටත් මාරු කර යවා ඇත.
මෙම සිද්ධිය සම්බන්ධයෙන් සභාපතිවරයා අත්අඩංගුවට ගැනීම සඳහා මේ වන විට පරීක්ෂණ ක්‍රියාත්මක බව පොලිසිය ප්‍රකාශ කළේය.
පසුගිය පළාත් පාලන මැතිවරණයෙන් අනතුරුව, සමගි ජන බලවේගය (SJB) ප්‍රමුඛ සන්ධානයක් විසින් කඩුගන්නාව නගර සභාවේ පාලනය පිහිටුවා ගත් අතර, එහි සභාපතිවරයා ලෙස ලක්ෂිත අබේරත්න තේරී පත් විය.
