ජාතික ජන බලවේගයේ රත්නපුර දිස්ත්‍රික් පාර්ලිමේන්තු මන්ත්‍රී ශාන්ත පද්මකුමාර මහතා සමඟ ඇති වූ බව පැවසුණු ගැටුමක් සම්බන්ධයෙන් වැඩතහනමකට ලක්කර සිටි සූරියකන්ද පොලිස් ස්ථානයේ කොස්තාපල් සුසන්ත හෙට්ටිආරච්චි මහතාට එරෙහි නඩුවෙන් ඔහු නිදහස් කර තිබේ.
එම නඩුව අද (02) ඇඹිලිපිටිය ප්‍රධාන මහේස්ත්‍රාත් අධිකරණය හමුවේ කැඳවූ අවස්ථාවේදී මෙසේ කොස්තාපල්වරයාව නඩුවෙන් නිදහස් කර ඇත.
මාර්ගය අවහිර කිරීම, සාපරාධී බියගැන්වීම සහ සාපරාධී අඩත්තේට්ටම් කිරීම සම්බන්ධයෙන් පොලීසිය විසින් මෙම නඩුව පවරා තිබූ නමුත් නඩුවට අදාළව චෝදනා ගොනුකිරීමට පොලීසිය අපොහොසත් වීම හේතුවෙන් මෙසේ සැකකරු නිදහස් කර ඇති බවයි ඔහු වෙනුවෙන් පෙනී සිටි නීතිඥ විජිත ජී. පුංචිහේවා මහතා සඳහන් කළේ.
සූරියකන්ද ප්‍රදේශයේ කංසා වැටලීමක් සම්බන්ධයෙන් මන්ත්‍රීවරයා සහ පොලිස් කොස්තාපල්වරයා අතර ඇති වූ ගැටුමකින් පසු දෙපාර්ශ්වය එකිනෙකාට එරෙහිව නඩු පවරා තිබිණි.
