කොළඹ LNW:මැතිවරණ වේදිකාවක් වේදිකාවක් පාසා රටේ ජනතාවට පොරොන්දු ලබා දෙමින් ජනතාවගේ අපේක්ෂා ඉහළටම ඔසවා තබා ජනාධිපතිවරණයේ ජයග්‍රහණයත් සමඟ ජනතාවට ලබා දුන් සියලු බලාපොරොත්තු කඩ වුණු යුගයක් උදා වී ඇති බව සමඟි ජන බලවේගයේ නායක සජිත් ප්‍රේමදාස මහතා පවසයි.
පොඩි මිනිසාට සේවය කරනවා යැයි කියා ජනතාවගේ කරපිටින් පත් වූ රටේ ජනාධිපතිවරයා අද ජනතාවට ලබා දුන් ඒ අහිංසක බලාපොරොත්තු ටික දිනෙන් දින කඩ කරන යුගයක සිටින බවයි ප්‍රේමදාස මහතා සඳහන් කරන්නේ.
විදුලි බිල අඩු කිරිම,අත්‍යාවශ්‍ය ආහාරවල මිල අඩු කරනවා යැයි පැවසීම, පාස්පෝට් පෝලිමට විසදුම් ලබා දීම, වැට් ඇතුළු බදු අඩු කිරීම, ඉන්ධන මිල අඩු කිරීම යන කරුණු යෝජනා කළද ඒ කිසිවක් නොකළ බවත් ඒවා කිරීමට පාර්ලිමේන්තුවේ අනුමැතිය අවශ්‍ය නොවන බවත් විධායක ජනාධිපතිවරයාගේ නියමයෙන් ඒවා කිරීමේ හැකියාව තිබියදී ඒ කිසිවක් නොකරමින් සිටින බවත් සජිත් ප්‍රේමදාස මහතා ප්‍රකාශ කරයි.
තවද අද වන විට අත්‍යාවශ්‍ය ආහාර ඇතුළු පොල් ගෙඩිවල මිල පවා ඉහළ ගොස් පොල් පෝලිම් පවා ඇතිව තිබෙන හෙයින් මුසාවෙන් මුලාවෙන් ජනතාව මුලා කරමින් සිටින බවයි හෙතෙම පවසන්නේ.
ජයග්‍රහණය කළ සැණින් තෙල් මිල සූත්‍රය අහෝසි කරනවා යැයි කියපු වත්මන් ජනාධිපතිවරයා මේ වන විට තෙල් මිල සූත්‍රයේ වහලෙක් බවට පත්ව ඇති බවත් තෙල් අඩු කළත් අඩු කර ඇත්තේ ධනපතින් භාවිතා කරන වාහන වලට අවශ්‍ය ඉන්ධනවල බවත් ප්‍රේමදාස මහතා තවදුරටත් කියාසිටියි.
සජිත් ප්‍රේමදාස මහතා මෙම අදහස් දක්වා සිටියේ උතුරු කොළඹ පැවැති ජන හමුවක් අමතමිනි.
ආශිකා බ්‍රාහ්මණ
