කොළඹ LNW:ඉන්දියාවේ නවදිල්ලි අගනුවර රතු බලකොටුව අසල පසුගිය 10 වැනිදා සිදුවූ පිපිරීමෙන් පසු අත්අඩංගුවට ගෙන සිටින සැකකරුවන්ගෙන් ත්‍රස්ත ප්‍රහාර මාලාවක් ගැන ඉන්දීය ආරක්ෂක අංශ අනාවරණය කරගෙන තිබේ.
එරට මාධ්‍ය වාර්තා පෙන්වා දෙන්නේ එළඹෙන දෙසැම්බර් 06 වැනිදා නවදිල්ලියේ ස්ථාන හයක පුපුරුවා හැරීම් සිදුකිරීමට සැලසුම් අකර ඇති බවයි.
1992 වසරේ දී ඇතිවූ ආගමික කැරැල්ලක් අතරතුර අයෝධ්‍යා හි ඉදිකර තිබූ බාබ්රී මුස්ලිම් දේවස්ථානය විනාශ කර දැමීමේ සංවත්සරය එළැඹෙන දෙසැම්බර් හයවැනි දිනට යෙදී ඇති අතර ඊට සමගාමීව බාබ්රී මුස්ලිම් දේවස්ථානය විනාශ කර දැමීමේ පළිගැනීමක් ලෙස නවදිල්ලි අගනුවර ස්ථාන හයකදී මෙම පිපිරීම් සිදුකිරීමේ සැලසුම් කර ඇති බවටයි තොරතුරු අනාවරණය කරගෙන ඇත්තේ.
මෙම සැලසුම් සකස්කර ඇත්තේ 10 වැනිදා පිපිරීමට සම්බන්ධ ‘ජයිෂ් ඊ මොහම්මද්’ නම් ඉස්ලාම් අන්තවාදී කණ්ඩායම වන අතර රතු බලකොටුව අසල පිපිරීමෙන් පසු ගතවූ දින තුනක කාලය තුළ ඉන්දීය පොලීසිය කාශ්මීරයේ සිදුකළ වැටලීම්වලින් 500කට ආසන්න පිරිසක් සැකපිට අත්අඩංගුවට ගෙන ඇති බවද ඉන්දීය මාධ්‍ය වාර්තා කරයි.
රතු බලකොටුව අසල පිපිරීමේ සිද්ධිය සම්බන්ධයෙන් ෆරිදාබාද්හි අල් ෆලා විශ්ව විද්‍යාලයේ සේවය කළ ජ්‍යෙෂ්ඨ වෛද්‍යවරු තිදෙනෙක් අත්අඩංගුවට ගෙන සිටින අතර උක්ත පුපුරුවා ගැනීම සිදුකර තිබුණේද එම විශ්ව විද්‍යාලයේම සේවය කරමින් සිටි වෛද්‍යවරයෙක් විසිනි. ඔහු ආචාර්ය උමාර් මොහොමඩ් නොහොත් උමාර් උන්-නබි ලෙස හදුනා ගැනුණි.
මෙම වෛද්‍යවරු ‘ජයිෂ් ඊ මොහම්මද්’ නම අන්තවාදී කල්ලියේ අලුතින් පිහිටුවන ලද ඉහළ උගත් වෘත්තිකයන්ගෙන් සමන්විත ත්‍රස්තවාදී මොඩියුලයේ කොටසක් බවට ඉන්දීය ආරක්ෂක අංශ සැක පළකර තිබේ.
ආශිකා බ්‍රාහ්මණ
