1. “යුක්රේනය ආක්‍රමණය කිරීම මගින් ජාත්‍යන්තර නීතිය උල්ලංඝණය කිරීම සම්බන්ධයෙන් රුසියාව වගකිව යුතු බවට” එක්සත් ජාතීන්ගේ මහා මණ්ඩලයේ දී කෙරෙන යෝජනාවට ශ්‍රී ලංකාව ඡන්දය දීමෙන් වැළකී සිටියි – යෝජනාවට පක්ෂව 94; විපක්ෂව 14; ඡන්දය ප්‍රකාශ කිරීමෙන් වැළකී සිටීම් 73 – යෝජනාව සම්මතයි.
2. “යෝජිත ණය ප්‍රතිව්‍යුහගත කිරීම” පිළිගැනීමට චීනයේ “අකමැත්ත” නිසා ශ්‍රී ලංකාවට IMF වෙතින් ලැබෙන ඇ.ඩො. බිලියන 2.9ක පහසුකම අහිමි විය හැකි බව විකල්ප ප්‍රතිපත්ති කේන්ද්‍රයේ අධ්‍යක්ෂ පාකියසෝති සරවනමුත්තු ප්‍රකාශ කරයි – ශ්‍රී ලංකාව සිය විදේශ විනිමය ණය පැහැර හරින බව ප්‍රකාශ කරේ, චීනය ඇ.ඩො. බිලියන 01 ක මුදල් ණයක් සහ ඇ.ඩො. බිලියන 1.5 ක වෙළඳ ණයක් ලබා දීමට සූදානම්ව සිටියදී බවට වාර්තා පෙන්වා දෙයි.
3. සුකේෂ් චන්ද්‍රසේකර් සම්බන්ධ ඉන්දීය රු. බිලියන 2ක මුදල් විශුද්ධිකරණ නඩුවේදී ශ්‍රී ලාංකික සම්භවයක් ඇති බොලිවුඩ් රංගන ශිල්පිනී ජැක්ලින් ෆර්නැන්ඩස්ට දිල්ලි අධිකරණය ඇප ලබා දෙයි.
4. තම අධීක්ෂණය යටතේ ආර්ථිකයේ “කඩා වැටීමක්” ඇති වීම වැළැක්වූ බව මහ බැංකු අධිපති ආචාර්ය නන්දලාල් වීරසිංහ ප්‍රකාශ කරයි – විශ්ලේෂකයන් මෙම ප්‍රකාශය සමඟ එකඟ නොවන අතර, ඔවුන් පෙන්වා දෙන්නේ, ඔහුගේ අධීක්ෂණය යටතේ උද්ධමනය සියයට 66 ක පවතින බවත්; භාණ්ඩාගාර බිල්පත් අනුපාත සියයට 33 ඉක්මවා ඇති බවත්; කුඩා හා මධ්‍ය පරිමාණ ව්‍යවසාය කඩා වැටී ඇති බවත්; රුපියල මාස 6 කට “ස්ථාවර” කර ඇති බවත්; ඇ.ඩො. බිලියන 3 කට වැඩි විදේශ විනිමය ණයක් නොගෙවා ඇති බවත්; රු. බිලියන 700 කට වැඩි මුදලක් මුද්‍රණය කර ඇති බවත්; ආර්ථිකය සියයට 8.5 ක සෘණ වර්ධනයක් පෙන්නුම්කරන බවත්; ජාත්‍යන්තර මූල්‍ය අරමුදලේ ණය අවිනිශ්චිත බවත්; සංචිත ප්‍රමාණය 2022 මාර්තු මස තිබූ මට්ටමට වඩා අඩු වී ඇති බවත්; බැංකුවලට ණයවර ලිපි විවෘත කළ නොහැකි වී ඇති බවත්; දේශීය ණය පැහැර හැරීමේ අවදානමක් මතුව ඇති බවත් ය.
5. 2023 අයවැය තමන් දශක ගණනාවක් තිස්සේ දැක ඇති හොඳම අයවැයක් බවට කොළඹ විශ්ව විද්‍යාලයේ ආර්ථික විද්‍යා මහාචාර්ය සිරිමල් අබේරත්න ප්‍රකාශ කරයි – එය වත්මන් ආර්ථික අර්බුදය ආමන්ත්‍රණය කරන බවත් රටට අවශ්‍ය දිගුකාලීන ප්‍රතිසංස්කරණ යෝජනා කරන බවත් පවසයි.
6. 2023 අයවැය තුළ ප්‍රශංසනීය ප්‍රතිසංස්කරණ යෝජනා රාශියක් අඩංගු වන අතර ඒවා නියමිත වේලාවට ක්‍රියාත්මක කළහොත් අයවැයට පෙර ගෙන යන මූල්‍ය ප්‍රතිසංස්කරණවලට මූලික වනු ඇති බව ලංකා වාණිජ මණ්ඩලය (Ceylon Chamber of Commerce) පවසයි.
7. රජය අපනයනකරුවන්ට සියයට 14 හෝ 15 ක වරණීය බදු අනුපාත ලබා දී ඇති නමුත් කිසිදු සාධනීය ප්‍රතිඵලයක් නොදුටු බව මහබැංකු අධිපති ආචාර්ය නන්දලාල් වීරසිංහ ප්‍රකාශ කරයි – අපනයනකරුවන්ට එවන් බදු අනුපාත ලබා දී තිබුණ ද ඔවුන් විදේශයන් හි ව්‍යාපාර ව්‍යාප්ත කිරීම නතර කර නොමැති බවට ද මැසිවිලි නඟයි.
8. 2022 අගෝස්තු මස පැනවූ තියුණු විදුලි ගාස්තු සංශෝධනය මඟින් වත් විදුලිබල මණ්ඩලයේ මෙහෙයුම් පිරිවැය ආවරණය නොවන බව Fitch Ratings ආයතනය පවසයි – තවත් විදුලි බිල ඉහල යාමක් වැළැක්විය නොහැකියි!
9. ජනාධිපති මන්දිරය අසල විරෝධතාවයකට සහභාගී වී පොලිස් රාජකාරියට බාධාකිරීම සම්බන්ධයෙන් අත්අඩංගුවට ගත් හිටපු පාර්ලිමේන්තු මන්ත්‍රිනී හිරුණිකා ප්‍රේමචන්ද්‍ර ඇතුළු 14 දෙනෙකුට කොළඹ ප්‍රධාන මහේස්ත්‍රාත් නන්දන අමරසිංහ ඇප ලබා දෙයි – යළි එවැනි චෝදනා මත අධිකරණයට ඉදිරිපත් වූවහොත් ඇප අවලංගු කරන බවට අනතුරු අඟවයි.
10. ඉදිකිරීම් අංශයට සහ අනෙකුත් අංශවලට රජය රු. බිලියන 200 ක පමණ නොගෙවූ භාණ්ඩාගාර බිල්පත් ඇති බව භාණ්ඩාගාර ලේකම් මහින්ද සිරිවර්ධන ප්‍රකාශ කරයි – රජය ආදායම් ප්‍රතිපත්ති ඉදිරිපත් කර ඇත්තේ එම බිල්පත් ගෙවීමට රජයට නොහැකි නිසා බව ද පවසයි.
