සටහන – නිශ්මං රණසිංහ
නොවැම්බර් 19,(LNW) කොළඹ :
සැම්බියාවේ පැවති ජාත්යන්තර බැඩිමින්ටන් සූරතාවලයිකදී ශ්රී ලංකාවේ හසිනි අම්බලන්ගොඩගේ සහ හසාරා විජේරත්න කාන්තා යුගල අනු සූරතාවය දිනා ගන්නට සමත් වුණා.තවත් අප්රිකානු රටක් වන බොට්ස්වානා හී එළැඹෙන 21 සිට 24 දක්වා පැවත්වෙන තවත් ජාත්යන්තර තරගාවලියකට ද මෙම ක්රීඩිකාවන් දෙදෙනා සහභාගි වෙනවා.
මෙයින් හසාර ඉකුත් වසරේ ජාතික බැඩ්මින්ටන් සූරතාවලියේදි අමන්දා ද අල්විස් සමඟ එක්ව කාන්තා යුගල සූරතාවය දිනා ගැනීමට සමත් වී තිබෙනවා.මේ මොහොතේ හසාරා,හසිනි සමඟ එක්ව යුගල තරග සඳහා සහභාගි වන අතර ඔවුන් සැම්බියාව,බොට්ස්වානා මෙන්ම දකුණු අප්රිකානු තරගාවලියට ද සහභාගි වී ජාතික සූරතාවලියට සහභාගි වීමට ශ්රී ලංකාවට පැමිණිමට නියමිතයි.
හසාරා සහ හසිනි ට අනු සූරතාවය හිමි කර දී සැම්බියා තරගාවලියේ යුගල සූරියන් වූයේ මාල දිවයින ක්රීඩිකාවන් දෙදෙනෙක්.ෆාතිමාත් නබාහා අබ්දූල් රසාක් සහ අමිනාත් නබීහා අබ්දූල් රසාක් නම් වූ ඔවුන් දෙදෙනා විසිපස් වියැති නිවුන් සොහොයුරියන් වෙනවා.ජාත්යන්තර තරග පිටියෙ අත්දැකීම බහුල මේ නිවුන් යුගලය මේ වන විට ජාත්යන්තර කාන්තා යුගල ශ්රේණිගත කිරීම්වල 129 වන තැන පසු වන යුගලයයි.එසේම ෆාතිමාත් කේවල තරග නියොජනය කරමින් ජාත්යන්තර ශ්රේණිගත කිරීම්වල 170 වන ස්ථානයේ ද පසු වෙනවා.
සාමාන්යයෙන් ශ්රී ලංකාවට වඩා දක්ෂතා අතින් පහළින් සිටින රටක් හැටියට පිළි ගැණුනද අබ්දූල් රසාක් නිවුන් සොහොයුරියන් සම්බන්ධයෙන් ගත් විට ඔවුන් විසින් ජාත්යන්තර අත්දැකීම් ලබා ගනිමින් කාන්තා යුගල තරගවලදී ඉහළ මට්ටමෙන් දස්කම් දක්වමින් සිටිනවා.මේ මඟින් නූතණ ලෝකය ක්රීඩාව අතින් වැඩි අවස්ථාවන් ප්රමාණයක් ප්රයෝජනයට ගෙන දක්ෂතා අතින් ඉදරියට එමින් සිටින්නට දක්වන උනන්දුව සහ කැපවීම පැහැදිළි වෙනවා.
