නව ප්‍රජාතන්ත්‍රවාදී පෙරමුණට (ගෑස් සිලින්ඩරය) හිමිවූ ජාතික ලැයිස්තු මන්ත්‍රී ධුර දෙකෙන් එකක් රවී කරුණානායක මහතා විසින් ලබාගැනීම නිසා පසුගිය සතියේ එක්සත් ජාතික පක්ෂය ඇතුළු එම කඳවුරේ දේශපාලනය තරමක් උණුසුම්ව පැවතුණි.
මෙම සිද්ධිය සම්බන්ධයෙන් මුලදී දැඩි කේන්තියකින් පසුවූ රනිල් වික්‍රමසිංහ මහතා පසුව සිය ස්ථාවරය වෙනස් කරගෙන ඇති බවයි දේශපාලන ආරංචිමාර්ග සඳහන් කළේ.
නව ප්‍රජාතන්ත්‍රවාදී පෙරමුණේ අපේක්ෂකයින් පිරිසක් රවී කරුණානායක මහතාට එරෙහිව අභියාචනාධිකරණය හමුවේ පෙත්සමක් ගොනු කිරීමට සූදානමින් සිටියත් ඉන්දියාවේ සංචාරය සඳහා පිටත් වීමට පෙර රනිල් වික්‍රමසිංහ මහතා ඔවුන්ව එයින් වළක්වා ඇති බව ආරංචිමාර්ග ප්‍රකාශ කළේය.
“රවී ගැන කලබල වෙන්න එපා. ලබන අප්‍රේල් වෙනකොට එයාගේ මන්ත්‍රීකම නැතිවෙනවා” යැයි රනිල් වික්‍රමසිංහ මහතා ඔවුන්ට ප්‍රකාශ කර ඇති බව සඳහන්.
එවැන්නක් සිදුවන්නේ කවරාකාරයෙන්ද යන්න සියලු දෙනාටම ප්‍රහේලිකාවක් වී ඇති අතර ඔවුන් ඒ සම්බන්ධයෙන් විමසීමේදී රනිල් වික්‍රමසිංහ මහතා පවසා ඇත්තේ “බලන්නකො කොහොමද වෙන්නෙ කියලා …” යනුවෙනි.
එමෙන්ම රවීගේ සිද්ධිය සම්බන්ධයෙන් මාධ්‍ය හමුවක් පැවැත්වූ එජාප සභාපති වජිර අබේවර්ධන මහතාට ද දෝෂාරෝපණය කර ඇති රනිල් වික්‍රමසිංහ මහතා මාධ්‍ය හමු පවත්වා අනවශ්‍ය ප්‍රචාරණයක් ලබා නොදෙන ලෙසත් පවසා ඇති බවත් ආරංචිමාර්ග වැඩිදුරටත් පැවසීය.
