ඊයේ (08) දින පැවැත්වූ දේව මෙහෙයක් අතරතුර දී ෆ්‍රැන්සිස් පාප්තුමා රුසියානු – යුක්රේන යුධමය තත්ත්වය හමුවේ යුක්රේනයේ වැසියන් විඳින දුක සිහිපත් කරමින් හඬා වැටී ඇති බව වාර්තා වේ.
මෙම දේව මෙහෙය පැවැත්වූයේ ඉතාලියේ රෝමයේ ස්පැනිෂ් ස්ටෙප්ස් (Spanish Steps) හි දී ය. මෙය සාම්ප්‍රදායික වශයෙන් කිතුණු බැතිමතුන් සඳහා පවත්වන දේවමෙහෙයකි.
දේව මෙහෙය ආමන්ත්‍රණය කරමින් සිටින අතරවාරයේ පාප්තුමා යුක්රේනයේ දුක්විඳින ජනතාව ගැන සඳහන් කර ඇති අතර, එහිදී තමා පාලනය කර ගැනීමට නොහැකි වූ තැන උන්වහන්සේ තම කතාව මොහොතකට නතරකර හැඟීම්බර වී තිබේ.
සිය කතාව යළි ආරම්භ කරන විට ද උන්වහන්සේගේ කටහඬ අවස්ථා කිහිපයක දී බිඳී යන අයුරු රැස්ව සිටි පිරිසට දැක ගැනීමට හැකිව තිබේ.
මෙම මොහොත පාප්වහන්සේ ට පමණක් නොව රුසියානු – යුක්රේන යුද්ධයේ අවසානයක් අපේක්ෂා කරන, සහ සාමය සඳහා පෙනී සිටින බොහෝ පිරිසකට හැඟීම්බර මොහොතක් වී ඇති බව වාර්තා වේ.
එම මොහොත කැමරා කාචයේ සටහන්ව තිබුණේ පහත පරිදි ය.
