දූෂණය පිටුදැකීම සඳහා කළයුතු වන්නේ දූෂණය සහජයෙන්ම වළක්වන සහ විනිවිදභාවය ප්‍රවර්ධනය කරන තාක්ෂණික නවෝත්පාදනයන් වැළඳ ගැනීම බව මව්බිම ජනතා පක්ෂයේ නායක දිලිත් ජයවීර මහතා පවසයි.
“අපේ ජාතියේ සංවර්ධනයේ මාවත පවතින්නේ දූෂිතයන් අත්අඩංගුවට ගැනීම බව හඟවන ජනප්‍රියවාදී දේශපාලන ආඛ්‍යානයක නැගී සිටීම මෑත කාලයේ අපි දුටුවෙමු. දූෂණය ආමන්ත්‍රණය කිරීම අත්‍යවශ්‍ය වන අතර, මෙම ප්‍රවේශය පමණක් අපේ රටේ ඉදිරි ගමනට විසඳුම නොවන බව මම තරයේ විශ්වාස කරමි. සංවර්ධනය සඳහා සැබෑ යතුර වන්නේ දූෂණය සහජයෙන්ම වළක්වන සහ විනිවිදභාවය ප්‍රවර්ධනය කරන තාක්ෂණික නවෝත්පාදනයන් වැලඳ ගැනීම තුළය.
අප ඔබට පරිවර්තනීය සංකල්පයක් හඳුන්වා දී ඇත. ඒ ‘ව්‍යවසායකත්ව රාජ්‍යයක්’ පිළිබඳ අදහසයි.
මෙම දැක්ම උපායමාර්ගික තීරණ ගැනීමේ සහ නවෝත්පාදනවල කේන්ද්‍රස්ථානයක් බවට අපේ රට නැවත සකස් කිරීමයි. එය අපගේ ජාතික න්‍යාය පත්‍රයේ ප්‍රමුඛස්ථානයේ ව්‍යවසායකත්වය සහ නිර්මාණාත්මක විසඳුම් ඇති සංස්කෘතියක් බිහිකිරීමයි.
ව්‍යවසායක ජාතියක් ලුහුබැඳීමේ අරමුණ හුදෙක් ආර්ථික වර්ධනය සඳහා පමණක් නොවේ. එය අපගේ මානසිකත්වය වෙනස් කිරීමක්. එය නිමක් නැති චෝදනා, දේශපාලන නාටක, ඉටු නොවුනු ප්‍රතිපත්ති ප්‍රකාශන වලින් පිරුණු විෂම චක්‍රයෙන් ඉවත් වී තිරසාර, කාර්යක්ෂම සහ ඉදිරි චින්තනයක් ඇති අනාගතයක් ගොඩනැගීම කෙරෙහි අවධානය යොමු කිරීමයි.
දේශපාලන වේදිකාවේ ‘හොරු ඇල්ලීම’ ගැන නිරතුරුව අවධානය යොමු කරන අය බොහෝ විට උනන්දු වන්නේ දූෂණ ප්‍රශ්නය සැබෑ ලෙස විසඳීමට වඩා ජනතා අවධානය දිනා ගැනීමටය.
අපගේ ඉලක්කය විය යුත්තේ දූෂණයට දඬුවම් ලබා දීම පමණක් නොව, වඩා වැදගත් වන්නේ, සුහුරු (ස්මාර්ට්) පාලනය සහ නව්‍ය භාවිතයන් හරහා දූෂණය වඩ වඩාත් දුෂ්කර වන පරිසරයක් නිර්මාණය කිරීමයි. අපගේ තීරණ උපායමාර්ගික චින්තනය සහ නවෝත්පාදන මගින් මෙහෙයවනු ලබන ව්‍යවසායක ජාතියක් බවට ශ්‍රී ලංකාව පරිවර්තනය කිරීමට එක්ව කටයුතු කරමු. මිත්‍රවරුනි, අපේ ආදරණීය රට සංවර්ධනය කිරීමේ සැබෑ මාවත එයයි.”
දිලිත් ජයවීර මහතා මේ බව පැවසුවේ පසුගියදා පැවති උත්සව අවස්ථාවක් අමතමිනි.
RN
