කොළඹ LNW:මැතිවරණ රාජකාරි සඳහා පොලිස් නිලධාරීන් 63000කට අධික ප්‍රමාණයක්, පොලිස් විශේෂ කාර්ය බළකා නිලධාරීන් 2500ක් හා සිවිල් ආරක්ෂක දෙපාර්තමේන්තු සාමාජිකයන් 12000ක් යෙදවීමට කටයුතු කරන බව පොලිස් මාධ්‍ය ප්‍රකාශක නියෝජ්‍ය පොලිස්පති නීතිඥ නිහාල් තල්දූව මහතා පවසයි.
ඡන්ද මධ්‍යස්ථාවල ආරක්ෂාව ඇතුළු මැතිවරණ කටයුතු සඳහා මෙම නිලධාරීන් යෙදවීමට කටයුතු කරන අතර ජංගම මුර සංචාර 3083ක් සිදුකිරීමට නියමිත බවයි ඔහු සඳහන් කරන්නේ.
මෙය සුළු වශයෙන් වෙනස් විය හැකි නමුත් ඒ සඳහා පොලිස් නිලධාරීන් 12400කට අධික ප්‍රමාණයක් අනුයුක්ත කර ඇති බව සඳහන්.
මේ අතර ජනාධිපතිවරණයට අදාළව මේ වන විට පැමිණිලි 449ක් ලැබී තිබෙන බවත් මේ වන විට පුද්ගලයන් 108ක් අත්අඩංගුවට ගෙන තිබෙන බවත් තල්දුව මහතා පවසයි.
මැතිවරණ දිනයේදී හා මැතිවරණ දිනයෙන් පසුව මාර්ග බාධක යෙදවීමට නියමිත අතර මේ සඳහා පොලිස් නිලධාරීන්ට අමතරව පොලිස් විශේෂකාර්ය බළකා නිලධාරීන් යෙදවීමට නියමිතයි.
එමෙන්ම කැරලි මර්දන කණ්ඩායම් ස්ථාපිත කර තිබෙන බවද පොලිස් මාධ්‍ය ප්‍රකාශකවරයා පවසයි.
දැනට විදුලි බලාගාර ඇතුළු පොදු ස්ථානවල රාජකාරි සිදුකරන පොලිස් නිලධාරීන් මැතිවරණ රාජකාරි සඳහා යොදවා තිබෙන බවත්, එම ස්ථානවලට යුද හමුදා නිලධාරීන් යෙදවා තිබෙන බවත්, මේ සඳහා නිලධාරීන් 3000කට අධික පිරිසක් රාජකාරියේ යොදවා සිටින බවත් ඔහු කියාසිටියි.
මේ අතර මැතිවරණ කොමිෂන් සභාව පිහිටා තිබෙන පරිශ්‍රයට විශේෂ ආක්ෂාවක් ද සපයා දී තිබේ.
ඡන්ද පැවැත්වෙන දින ඡන්ද මධ්‍යස්ථාන අවට කණ්ඩායම් වශයෙන් රැස් වීමේ අවස්ථාවක් නොමැති අතර අනවශ්‍ය ලෙස කටයුතු කරන පුද්ගලයන්ට නීතිය ක්‍රියාත්මක කරන බවයි තල්දුව මහතා පවසන්නේ.
මත් පැන් පානය කර ඡන්ද මධ්‍යස්ථාවලට ඇතුළු වීමට අවසර ලබා නොදෙන බවත්, පිහිතල වැනි ආයුධ රැගෙන පැමිණිය හොත් අත්අඩංගුවට ගැනීමට පවා සිදුවන බවද ඔහු අවධාරණය කරයි.
ආශිකා බ්‍රාහ්මණ
