අග්‍රාමාත්‍යවරයා සහ කැබිනට් මණ්ඩලය ඉවත්කර අන්තර්කාලීන ආණ්ඩුවක් පිහිටුවීමට කටයුතු නොකරන්නේ නම් සංඝ සම්මුතියක් ප්‍රකාශයට පත්කර සියලු දේශපාලනඥයින් ප්‍රතික්ෂේප කිරීමට කටයුතු කරන බව ඊයේ (30) කොළඹදී සංඝ සම්මේලනයක් පැවැත්වූ මහා සංඝරත්නය දැනුම් දී තිබේ.
අගලකඩ සිරිසුමන හිමි, ඕමල්පේ සෝභිත හිමි ඇතුළු භික්ෂූන් වහන්සේලා රැසක් විසින් කොළඹ නිදහස් චතුරස්‍රයේදී මෙම සංඝ සම්මේලනය පවත්වනු ලැබිණි.
මෙම අන්තර්කාලීන ආණ්ඩුව පිහිටුවීම වත්මන් ආණ්ඩුවේම ප්‍රබලයින්ව සිට මෑතකදී පාර්ලිමේන්තුවේ ස්වාධීන වූ මෛත්‍රීපාල සිරිසේන මහතාගේ නායකත්වයෙන් යුත් ශ්‍රී ලංකා නිදහස් පක්ෂය, විමල් වීරවංශ. උදය ගම්මන්පිල සහ වාසුදේව නානායක්කාර යන හිටපු ඇමතිවරුන් ඇතුළු ආණ්ඩුවේ කුඩා පක්ෂ සන්ධානය විසින් ඉදිරිපත් කළ යෝජනාවක් වේ. රටේ ජනතාව වීදිබැස ඇත්තේ ජනාධිපති ගෝඨාභය රාජපක්ෂ මහතාට ඉල්ලා අස්වන ලෙස බලකරමින් වුවත් මේ අන්තර්කාලීන ආණ්ඩුව යෝජනා කරන විමල්, ගම්මන්පිල, වාසු ඇතුළු කණ්ඩායමේ දැඩි මතය වී ඇත්තේ කිසිසේත්ම ගෝඨාභය රාජපක්ෂ මහතා තනතුරින් ඉවත් නොවිය යුතු බවට ය.
ඒ අනුව ගෝඨාභය රාජපක්ෂ මහතා වෙනුවට මහින්ද රාජපක්ෂ මහතා ඉවත් කර ශ්‍රී ලංකා පොදුජන පෙරමුණෙන්ම අගමැතිවරයෙකු පත්කරගෙන පාර්ලිමේන්තුවේ සෙසු පක්ෂවල කිහිපදෙනෙකුටත් ඇමතිකම් ලබාදී ආණ්ඩුවක් පිහිටුවීමට කෙරෙන මේ යෝජනාව මේ වීදිබැස සිටින ජනතාව කිසිසේත් පිළිනොගනු ඇති බව පෙනේ.
RN
