රෂිකා හෙන්නායක අප්‍රේල් 12 කොළඹ LNW :
ඩුබායි සිට කටුනායක ගුවන් තොටුපොළ වෙත පැමිණි ගුවන් යානයක ගමන්ගත් මගී කාන්තාවකට ලිංගික අඩන්තේට්ටම් කළ ඉන්දීය ජාතිකයෙකු ගුවන් තොටුපොළ පොලීසිය විසින් අත්අඩංගුවට ගෙන තිබෙන බව වාර්තා වේ.
අදාළ කාන්තාව ඩුබායිහි සේවය කළ මීගමුව ප්‍රදේශයේ පදිංචි 31 හැවිරිදි කාන්තාවක් වන බව සඳහන් වේ.
“ෆිට්ස් එයාර්” ගුවන් සේවයේ ඒ.ඩී – 822 දරන ගුවන් යානයෙන් ඇය ඩුබායි සිට කටුනායක ගුවන් තොටුපොළ වෙත පැමිණ තිබෙන අතර,ඇය ගමන්ගත් ගුවන් යානය තුළ සිටි 35 හැවිරිදි ඉන්දීය ජාතිකයෙකු විසින් ඇයට ලිංගික අඩන්තේට්ටම් සිදුකර ඇති බව වාර්තා වේ.
මේ පිළිබදව එම කාන්තාව ගුවන් යානා කාර්යය මණ්ඩලය දැනුවත් කිරීමට පියවර ගෙන ඇත.
අනතුරුව ගුවන් යානය කටුනායක ගුවන් තොටුපොළ වෙත ගොඩබැස්සවීමෙන් පසු ගුවන් තොටුපොළ ආරක්ෂක නිලධාරීන් විසින් අදාළ ඉන්දීය ජාතිකයා කටුනායක ගුවන් තොටුපොළ පොලීසිය වෙත භාරදී ඇති බව සඳහන් වේ.
මේ පිළිබද ගුවන් යානා කාර්යය මණ්ඩලයෙන් ද පොලීසිය ප්‍රකාශ සටහන් කර ගෙන ඇති අතර, වින්දිත කාන්තාව සහ සැකකාර ඉන්දීය ජාතිකයා වෛද්‍ය පරීක්ෂණයකට යොමු කර තිබෙන බව පැවසේ.
එලෙස අත්අඩංගුවට ගත් ඉන්දීය ජාතිකයා කොළඹ, අංක 01 මහේස්ත්‍රාත් අධිකරණය වෙත ඉදිරිපත් කිරිමට නියමිත බව සඳහන් වේ.
