රට තුළ තැනින් තැන සිදුවන වෙඩිතැබීම් ඇතුළු අපරාධ මැඩපැවැත්වීම සඳහා පොලීසිය තමන්ට හැකි උපරිමයෙන් කටයුතු කරමින් සිටින බව පොලිස් මාධ්‍ය ප්‍රකාශක බුද්ධික මනතුංග පවසයි.
ප්‍රශ්නය – දිගින් දිගටම මේ අපරාධ සිද්ධ වෙනවා, පොලිසිය බලන් ඉන්නවා. දැන් මේක පුංචි චිකාගෝවක් කියලා ජනතාව අතර මතයක් තියෙනවා. ඇත්තටම පොලීසිය ක්‍රියාත්මක වෙන්නෙ නැද්ද ? ඇත්තටම පොලීසිය නිදාගෙනද ඉන්නෙ ?
“ඔබ බැලුවොත් වෙඩිතැබීම් සිද්ධිවල මම ඔබට සංඛ්‍යා දත්ත වශයෙන් පෙන්නුවා මීට අදාළව අත් අඩංගුවට ගත්ත ආයුධ, එමෙන්ම වෙඩිතබා ගැනීමේ සිදුවීම්වල වෙඩිතැබීමට පෙර ගම්පහ ප්‍රදේශයේදී T56 ගිනිඅවි සමග පුද්ගලයින් අත් අඩංගුවට ගත් ආකාරය ඔබ පසුගිය කාලයේ දැක්කා. ඒ නිසා පොලීසිය නිදාගෙන නෙවෙයි මේ සියලු දේවල් අපි කරනවා. එමෙන්ම මීට අදාළව විදෙස් රටවල සිටි පුද්ගලයන් ලංකාවට ගෙන ඒමත් ඔබ දැක්කා. එම නිසා පොලීසිය කළ හැකි උපරිම මට්ටමින් ක්‍රියා කරනවා”
පොලිස් මාධ්‍ය ප්‍රකාශකවරයා මේ බව පැවසුවේ ඊයේ (මැයි 05) උදෑසන 19 හැවිරිදි තරුණයෙකු වෙඩිතබා ඝාතනය කිරීමේ සිද්ධිය සම්බන්ධයෙන් අනාවරණය වී ඇති කරුණු පැහැදිලි කිරීම සඳහා පැවැත්වූ මාධ්‍ය හමුවකදී ය.
