සටහන – රුවන් නෙළුගොල්ල
කහවත්ත, යාඉන්න ප්‍රදේශයේදී ඊයේ (30) රාත්‍රියේ සිදුවූ වෙඩිතැබීමකින් තරුණයෙකු මියගොස් තවත් තරුණයකු තුවාල ලබා තිබේ.
කහවත්ත, යාඉන්න, කොස්කෑල්ල ප්‍රදේශයේ නිවසකට ඊයේ රාත්‍රී පැමිණි පුද්ගලයින් සිව්දෙනෙකු නිවසේ සිටි තරුණයින් දෙදෙනෙකු පැහැරගෙන ගොස් ඇත. එසේ පැහැරගත් තරුණයින් දෙදෙනාව පාළු ප්‍රදේශයකට රැගෙන ගොස් වෙඩිතබා ඇති අතර එහිදී එක් තරුණයකු එම ස්ථානයේදීම මියගොස් ඇත. වෙඩි වැදීමෙන් තුවාල ලැබූ අනෙක් තරුණයා ප්‍රතිකාර සඳහා කහවත්ත මූලික රෝහලට ඇතුළත් කර ඇති බවයි පොලීසිය සඳහන් කළේ.
මෙසේ මියගොස් ඇත්තේ 22 හැවිරිදි තරුණයකු වන අතර තුවාල ලබා සිටින්නේ 27 හැවිරිදි තරුණයෙකි.
කවුරුන් විසින් කුමන හේතුවක් මත මෙම වෙඩි තැබීම සිදුකළේ ද යන්න මෙතෙක් අනාවරණය වී නොමැති අතර කහවත්ත පොලීසිය විමර්ශන සිදුකරයි.
