නිශ්මං රණසිංහ ජූලි 11, කොළඹ LNW:
බංගලාදේශ ප්‍රිමියර් පාපන්දු ගීගය වෙනුවෙන් විදේශ ක්‍රීඩකයන් කැඳවීමට ඇති අවස්ථාව අනුව ෆෝටිස් එෆ්සී කණ්ඩායම සමඟ එක්වන්නට ශ්‍රී ලංකා පාපන්දු කණ්ඩායමේ නායක සුජාක් පෙරේරා එකඟතාවය පළ කර තිබෙනවා.මෙවර බංගලාදේශ ප්‍රිමියර් පාපන්දු ලීගයට ක්‍රීඩා කිරීමට එරට ක්‍රීඩා සමාජයක් සමඟ ගිවිසුමකට එළැඹි පළමු ක්‍රීඩකයා වන්නේ ද සුජාන් පෙරේරා යි.
විදේශගතව සිටින ශ්‍රී ලංකා සම්භවයක් ඇති ක්‍රීඩකයින් ජාතික කණ්ඩායම නියෝජනය කිරීම මේ දිනවල අපට හුරු පුරුදු කාරණයක් වුව ද,විශාල කාලයකට පසුව ශ්‍රී ලංකාවේම ක්‍රීඩා කරන ලාංකේය ක්‍රීඩකයෙක් මේ ආකාරයට විදේශ කණ්ඩායමකට එක්වීම සතුටුදායක තත්ත්වයක් නිර්මාණය කරනවා. දශක තුනකට එපිට දකුණු ආසියාතික රටවල ක්‍රීඩා සමාජවලට ක්‍රීඩා කරමින් යම් වෘත්තීය පදනමකින් පාපන්දු ක්‍රීඩාවේ නියැළි ලාංකේය පාපන්දු ක්‍රීඩකයින් ද සිටියේය.ඒ අතර උපුල් ප්‍රේමලාල්,අශෝක රවීන්ද්‍ර,අශෝක නැව්ගලගේ,මහින්ද පාලිත යන ක්‍රීඩකයෝ එම රටවල ද ඉමහත් ජනප්‍රියත්වයට පත්ව සිටියහ.මේ වන විට එම නම් ශ්‍රී ලංකා පාපන්දුව සමඟ අඩුවෙන් සිහිපත් වුව ද,අශෝක නැව්ගලගේ වසර කිහිපයකට පෙර පාපන්දු තේරීම් කමිටුවේ සභාපතිවරයා සිටි බව මතකය.
සුජාන් මේ නැවත පන දෙන්නේ මැකුණු ඉතිහාසයකටය.එම තත්ත්වය ඇති කිරීමට ශ්‍රී ලංකා පාපන්දු කණ්ඩායමේ දක්ෂතාවයන් සාමූහිකව ගත් විට වැදගත් වන අතර මේ මොහොතේ ඒ ආකාරයෙන් දක්ෂ පාපන්දු කණ්ඩායමක් නිර්මාණය කිරීමට අවශ්‍යය පරිසරයකට ශ්‍රී ලංකා පාපන්දු පරිපාලනය එකඟ වී ඇති විවාද සම්පන්න ඇතැම් තීරණ ද සුජාන්ගේ මේ තෝරා ගැනීමට හේතුවක් බව පිළිගත යුතුය.
