රෂිකා හෙන්නායක අගෝස්තු 16, කොළඹ LNW:
ආයුධ තොගයක් සමඟ අත්අඩංගුවට ගත් කටුනායක ගුවන් තොටුපල ආරක්ෂක නිලධාරියා සම්බන්ධයෙන් ආයතන මට්ටමින් විමර්ශනයක් ආරම්භ කර ඇති බවත්, අනාවරණය වන තොරතුරු මත ඉදිරි පියවර ගන්නා බවත්, වරාය සහ සිවිල් ගුවන් සේවා නියෝජ්‍ය අමාත්‍ය ජනිත රුවන් කොඩිතුවක්කු මහතා පැවසීය.
ඊයේ (16) දින මිනුවන්ගොඩ පොලීසිය විසින් එලෙස අත් අඩංගුවට ගනු ලැබුවේ, ශ්‍රී ලංකා නිදහස් සේවක සංගමයේ හිටපු ශාඛා සභාපති සහ කටුනායක ගුවන්තොටුපලේ ආරක්ෂක නිලධාරියෙකු වන චන්දිම ජයරත්න නැමැත්තා හෙවත් ගැස්මායි.
ලැබුණු තොරතුරක් මත කළ පරීක්ෂාවකදි චන්දිම ජයරත්න හෙවත් ගැස්මාගේ නිවසක මල්ලක බහා තිබියදී ටි 56 ගිනි අවියක්, එම අවියට භාවිතා කරන මැගසින් එකක්, මිලිමිටර් දෙකයි දශම දෙකේ පිස්තෝලයක්, ටි 56 උණ්ඩ 14 ක්, මීලිමිටර් 9 වර්ගයේ පිස්තෝල සදහා භාවිත කරන උණ්ඩ 06 ක්, මිලීමිටර් දෙකයි දශම දෙකේ උණ්ඩ 09 ක් ,පිස්තෝල හා රිවෝල්වර වර්ගයේ ගිනි අවි ආකෘති 02ක්, කඩු 03 ක් සහ කිනිසි 02 ක් සොයා ගත් බව පොලිසිය සඳහන් කළේ ය.
සැකකරු අත්අඩංගුවට ගත් අද අධිකරණයට ඉදිරිපත් කිරීමට නියමිතව ඇති බව වාර්තා වේ.
