ඉසුරු පරාක්‍රම
අගෝස්තු 30, ලෝකය (අවුට්බවුන්ඩ් ටුඩේ): මේ දිනවල පුදුම හිතෙන පුවත් හරිහරියට ඇහෙන එක සාමාන්‍ය කරුණක් බවට පත්ව තිබේ. එළියේ සිටි බොහෝ පුද්ගලයන් ඇතුළට යනවිට ඈත අහසේ සිට ඇතුළට එන්න හදන අමුත්තකු පිළිබඳ පුවතක් මේ දිනවල ජාත්‍යන්තර මාධ්‍ය කළඹා තිබේ.
මේ අමුත්තාගේ නම ත්‍රීඅයි/ඇට්ලස්.
ත්‍රීඅයි/ඇට්ලස් පිළිබඳ පුවත මුලින්ම මාධ්‍ය උණුසුම් කළේ ඉකුත් ජූලි මස පළමුවෙනි දින ය. අන්තර්තාරකා වස්තුවක් ලෙස මෙම ත්‍රීඅයි/ඇට්ලස් හඳුනාගනු ලැබුවේ චිලී රටේ ඇස්ටරොයිඩ් ටෙරෙස්ට්‍රියල්-ඉම්පැක්ට් ලාස්ට් එලර්ට් සිස්ටම් (ඇට්ලස්) දුරේක්ෂය විසිනි. හුදෙක් ග්‍රහක වස්තුවක හැසිරීමට පරිබාහිර අසාමාන්‍ය හැසිරීමක් දක්වන අන්තර්තාරකා වස්තුවක් මෙසේ මිනිස් ඇසට නිරීක්ෂණය වන්නේ තුන්වන වරට බව කියවේ. පළමු වරට මෙවන් අසාමාන්‍ය හැසිරීමක් දක්වන වස්තුවක් නිරීක්ෂණය වූයේ 2017 වසරේවන අතර එය ටූඅයි/ඔව්මුවාමුවා ලෙස නම්කළ අතර, දෙවන වරට නිරීක්ෂණය වූයේ 2019 වසරේවන අතර එය ටූඅයි/බොරිසොව් ලෙස නම්කරන ලදී.
එහෙත් ත්‍රීඅයි/ඇට්ලස් විශේෂ වන්නේ ඇයි?
මෙම ත්‍රීඅයි/ඇට්ලස් නම් අන්තර්තාරකා වස්තුව පැයට සැතපුම් 130,000 ක (පැයට කිලෝමීටර 210,000 ක පමණ) වේගයකින් අපගේ සෞරග්‍රහ මණ්ඩලයට ඇතුළු වෙමින් තිබේ. එය තත්ත්පරයට කිලෝමීටර 60 ක පමණ වේගයකි. ඒ අනුව අධික වේගයකින් මෙය සෞරග්‍රහ මණ්ඩලයට ඇතුළු වෙමින් පවතින අතර, එහි හරස්කඩ කිලෝමීටර 10ක් පමණ වේ. මෙය කලින් නිරීක්ෂණය වූ ඔව්මුවාමුවා ට වඩා සිය ගුණයකින් විශාලවන අතර, බොරිසොව්ට වඩා දස ගුණයකින් විශාල වේ.
ඒ අනුව සෞරග්‍රහ මණ්ඩලය හරහා ගමන් කරන, දැනට දිස්ව ඇති විශාලතම අන්තර්තාරකා වස්තුව ලෙස ත්‍රීඅයි/ඇට්ලස් හඳුනාගෙන තිබේ.
එමෙන්ම, එහි රසායනික සංයුතියේ ද කැපී පෙනෙන අසාමාන්‍ය ලක්ෂණ පවතී. ජේම්ස් වෙබ් අභ්‍යවකාශ දුරේක්ෂයට (ජේඩබ්එස්ටී) අනුව මෙම වස්තුවෙන් අධික කාබන් ඩයොක්සයිඩ් ප්‍රමාණයක් මුදාහරින අතර, අසාමාන්‍ය ලෙස ඉහළ කාබන් ඩයොක්සයිඩ් – ජල අනුපාතයක් පවතියි. මෙම වස්තුව හුදෙක් වල්ගා තරුවක් ලෙස සැලකුවහොත් එය වල්ගා තරුවකින් වාර්තාවන ඉහළම කාබන්ඩොයක්සයිඩ්, ජල අනුපාත ලෙස සැලකිය හැකි ය. මේ අතර, මින් මුදාහැරෙන ජල වාෂ්ප, කාබන් මොනොක්සයිඩ්, කාබොනිල් සල්ෆයිඩ් සහ දුහුවිලි වැනි දේ ද නිරීක්ෂණය කිරීමට හැකියාව ලැබී තිබේ.
එහෙත්… ත්‍රීඅයි/ඇට්ලස් සැබවින් ම වල්ගා තරුවක් ද?
විද්‍යාඥ ප්‍රජාව පමණක් නොව, තාරකා විද්‍යාව පිළිබඳ උනන්දුව දක්වන ජනතාව අතර පවා දැවැන්තම කුතුහලයක් හා කලබලයක් ජනිත වන්නේ මෙහිදී ය.
මෙම වස්තුවේ වයස නීර්ණය කිරීමේ දී එය අප ජීවත්වන සෞරග්‍රහ මණ්ඩලයට ද වඩා පැරණිවිය හැකි බවට විද්‍යාඥයහු අනුමාන කරති. ත්‍රීඅයි/ඇට්ලස් වස්තුව ගමන්කරන අධික වේගය, එය සෞරග්‍රහ මණ්ඩලය හරහා ගමන්කරන අසාමාන්‍ය ගමන් පථය සහ එය සතු අසාමාන්‍ය රසායනික සංයුතිය අනුව, මෙය හුදෙක් වල්ගා තරුවක් ද, නැතහොත් වෙනත් මානයක ඉදිකිරීමක් ද යන සැකය පහළ වී තිබේ.
එපමණක් නොව, සාමාන්‍ය වල්ගා තරුවකින් ආලෝකය විහිදුවනු ලබන්නේ එහි වලිගය දිස්වන පිටුපසිනි. නමුත් ත්‍රීඅයි/ඇට්ලස් නම් අන්තර්තාරකා වස්තුවේ ඉදිරිපසින් වාහනයක ලාම්පු දල්වා තිබෙන මෙන් ආලෝකයක් විහිදුවයි. තවද, කාබන් ඩයොක්සයිඩ්, කාබන් මොනොක්සයිඩ් වැනි වායුන් වහනය කරනු ලබන්නේ එන්ජින් ක්‍රියාත්මකවන උපකරණවලිනි.
ඒ අනුව, ත්‍රීඅයි/ඇට්ලස් යනු ඉතා සංකීර්ණ තාක්ෂණයක් මඟින් කෘතිමව නිර්මාණය කරන ලද්දක් ද යන කුකුස විද්‍යාඥ ප්‍රජාව මෙන්ම තාරකා විද්‍යාව පිළිබඳ උනන්දුවක් දක්වන ජනතාව අතර පහළ වී තිබේ.
මෙම වස්තුව සැබවින්ම අන්තර්තාරකා වස්තුවක් ද, නැතහොත් අපට වඩා දියුණු පිටසක්වල ජීවීන් කොට්ඨාශයක් විසින් නිර්මාණය කරන ලද යන්ත්‍රයක් ද යන විවාදය සංවාදයට එකතුවන්නේ, හාවර්ඩ් විශ්ව විද්‍යාලයේ තාරකා භෞතික විද්‍යාඥ ඒවි ලෝබ්, අන්තර්තාරකා අධ්‍යයන සඳහා දායකවන පර්යේෂකයන්වන ඇඩම් හිබර්ඩ් සහ ඇඩම් ක්‍රෝල් සමඟ එක්ව පළකරන ලද වාර්තාවක් හේතුවෙනි. එහි දැක්වෙන්නේ, ත්‍රීඅයි/ඇට්ලස් පිටසක්වල සම්භවයක් ඇති තාක්ෂණික කෞතුක වස්තුවක් විය හැකි බවත්, ඇතැම්විට මෙය සතුරු පිටසක්වල ක්‍රියාකාරකමක් සඳහා එවන ලද වස්තුවක් විය හැකි බවත් ය. සෞරග්‍රහ මණ්ඩලයේ අඟහරු, බ්‍රහස්පති සහ සිකුරු වැනි ග්‍රහලෝකයන් අසලින් සූර්යයාට සමීපව, එහෙත් පෘථිවියට පරිබාහිරව ගමන් කිරීමට නියමිත මෙම වස්තුවේ හැසිරීම අනුව, එය රහසිගත පිටසක්වල මෙහෙයුමක් සඳහා එවන ලද යමක් විය හැකි බවයි ඔවුන් එම වාර්තාවේ සඳහන්කර ඇත්තේ.
මෙම අදහස් තරයේ ප්‍රතික්ෂේප කිරීමට නාසා ආයතනය මෙන්ම ජේඩබ්එස්ටී ද කටයුතුකළ අතර, මෙම වස්තුව සම්බන්ධයෙන් ලැබී ඇති සාක්ෂි අනුව මෙය හුදෙක් ස්වභාවික වල්ගා තරුවක් බඳු වූ වස්තුවක් විය හැකි බවට එම ආයතන අවධාරණය කරයි. මෙම වස්තුව පිටසක්වල තාක්ෂණයක නිර්මාණයක් විය හැකි බවට වූ තර්කය විකාරයක් මෙන්ම විද්‍යාඥ ප්‍රජාවට කරන අපහාසයක් බවට විද්‍යාඥ ප්‍රජාවේ ඇතැම්හු වාද කරති.
කෙසේවෙතත්, අභ්‍යවකාශ කාරණා පිළිබඳ ගෝලීය ප්‍රවේශය පවතින නාසා ආයතනය පවා වැරදි තොරතුරු ජනගතකළ අවස්ථා එමට පවතී. ඊලෝන් මස්ක් තම මෝටර් රථයක් අභ්‍යවකාශයට මුදාහැරි විට එය, මෝටර් රථයක් බවට හඳුනා නොගෙන එය ද වල්ගා තරුවක් යැයි ජනතාවට පවසන ලද්දේ ද මෙම නාසා ආයතනයම ය. ඒ අනුව, ත්‍රීඅයි/ඇට්ලස් සම්බන්ධයෙන් පවතින තර්ක විතර්ක, කුමන්ත්‍රණ න්‍යායන් සහ විද්‍යාත්මක සාක්ෂි ප්‍රවේශමෙන් තෝරාබේරා ගෙන ඒ පිළිබඳ විවෘත මානසිකත්වයකින් යුතුව අවධානය යොමුකරන්නේ නම් වඩා යහපත් බව මාගේ විශ්වාසයයි.
ඡායාරූප: අන්තර්ජාලය
මූලාශ්‍ර:
https://timesofindia.indiatimes.com/science/alien-spaceship-or-comet-nasa-shares-update-on-mysterious-object-racing-through-the-solar-system/articleshow/123520962.cms
https://www.chron.com/news/space/article/interstellar-comet-3i-atlas-nasa-21019864.php
https://www.livescience.com/space/comets/james-webb-telescope-images-reveal-theres-something-strange-with-interstellar-comet-3i-atlas
https://www.moneycontrol.com/science/a-comet-or-alien-spaceship-what-s-real-truth-about-newly-found-interstellar-object-3i-atlas-that-sparks-debate-among-scientists-article-13336673.html
https://arxiv.org/abs/2508.18209
https://economictimes.indiatimes.com/news/international/global-trends/meet-avi-loeb-the-harvard-scientist-who-says-ancient-3i/atlas-comet-is-actually-an-alien-ship/articleshow/123020603.cms
