රෂිකා හෙන්නායක නොවැම්බර් 17, කොළඹ LNW :
වෘත්තීය ක්‍රියාමාර්ගයක නිරත රජයේ වෛද්‍ය නිලධාරීන්ගේ සංගමය සහ ජනාධිපති අනුර කුමාර දිසානායක මහතා අතර සාකච්ඡාවක් අද උදෑසන පැවැත්වීමට නියමිතව තිබෙන බව වාර්තා වේ. අදාළ සාකච්ඡාව ජනාධිපති ලේකම් කාර්යාලයේදි පැවැත්වෙන බව එම සංගමයේ මාධ්‍ය ප්‍රකාශක වෛද්‍ය චමිල් විජේසිංහ මහතා පැවසුවේය.
සෞඛ්‍ය සේවාවේ සහ වෛද්‍යවරුන්ගේ ගැටළු නිසියාකාරව විසඳීමට මෙවර ඉදිරිපත් කළ අයවැය යෝජනාව තුළින් අපොහොසත් වී ඇති බවත් ඊට විසඳුම් ලබා දෙන ලෙසත් රජයට බල කරමින් පෙරවරු 08ට දිවයින පුරා සියලුම රෝහල්වල වෘත්තීය ක්‍රියාමාර්ගය ආරම්භ කළ බවද වෛද්‍ය චමිල් විජේසිංහ මහතා කියා සිටියේය.
රජයේ වෛද්‍ය නිලධාරීන්ගේ සංගමය සූදානම් වන්නේ ජනාධිපතිවරයා සමග පැවැත්වෙන සාකච්ඡාවේදී සිය ගැටලුවලට විසඳුම් ලබා නොදුනහොත් දැඩි වෘත්තීය ක්‍රියාමාර්ගයකට එළඹීමට බව වැඩිදුරටත් වාර්තා වේ.
