තමන්ව ශ්‍රී ලංකා මහබැංකු අධිපති ධුරයට පත් කළ ජනාධිපතිවරයා සහ අගමැතිවරයා යන දෙදෙනාම ඉවත් වුවත් තමන් මහබැංකු අධිපති ධුරයෙන් ඉවත් නොවන බව නන්දලාල් වීරසිංහ මහතා ප්‍රකාශ කර තිබේ.
ඊයේ (11) දිනයේදී මාධ්‍යවේදීන් පිරිසක් සමග ඒ මහතා මේ බව ප්‍රකාශ කර ඇති බවයි ආරංචිමාර්ග සඳහන් කළේ.
“ඇයි මම යන්නේ ? මාව පත් කළා විතරයි. මට අවුරුදු 6ක් ධුර කාලය තියෙනවා. මහ බැංකුව කියන්නේ ස්වාධීන ආයතනයක්. මමත් ඉන්දියාවේ සංචිත බැංකුව (RBI) වගේ කාටවත් යටත් නොවී ස්වාධීනව මේක පාලනය කරගෙන යනවා. ආර්ථිකය සෞභාග්‍යමත් කරන්න අපි අලුතින් පටන් ගමු” යැයි ඒ මහතා පැවසූ බව ආරංචිමාර්ග සඳහන් කළේය.
එසේම රටේ පවතින දේශපාලන අස්ථාවරභාවය IMF සාකච්ඡා කෙරෙහි අහිතකර ලෙස බලපෑමට හැකි බව පවසා ඇති ඒ මහතා මේ වනවිට තවත් ඇමරිකා ඩොලර් බිලියනයක විදේශ විනිමය හුවමාරු පහසුකමක් ලබාගැනීම සඳහා තමන් ඉන්දියානු සංචිත බැංකුව සමග සාකච්ඡා කරගෙන යන බවත් ප්‍රකාශ කර ඇත.
RN
