ඇඩොල්ෆ් විසිනි
මෑත කාලීන ශ්‍රී ලාංකීය දේශපාලනයේ වඩාත් ප්‍රහේලිකාත්මක කනපිට හැරවීමක් ලෙස සුනිල් හඳුන්නෙත්තිගේ දේශපාලන ගමන හැඳින්විය හැකි ය. හඳුන්නෙත්ති යනු, මෑත අතීතයේ පක්ෂ අතර මෙන්ම ඔහු සමඟ මතවාදීව එකඟ නොවන තැනැත්තන් අතර පවා බොහෝ සෙයින් ගරුත්වයට පාත්‍ර වූ පුද්ගලයෙකි. පොදු ව්‍යාපාර පිළිබඳ කාරක සභාවේ (COPE) සභාපතිධුරය දැරූ කාලය තුළ, ඔහු තම වගකීම් බැරෑරුම් ව සැලකූ කඩිසර, නිර්භීත පාර්ලිමේන්තු මන්ත්‍රීවරයකු ලෙස කීර්තියක් අත්කර ගත්තේය. එම භූමිකාව තුළ, ඔහු රජය සතු ව්‍යාපාර කිහිපයක ම සිදු වූ නාස්තිය, අතිරික්තයන් සහ පැහැදිලි වැරදි කලමනාකරණයන් හෙලිදරව් කිරීමට සමත් විය. ඔහුගේ කාර්යභාරය, රජයේ ව්‍යාපාරවල නියුතු වූවන්ගේ ගිණුම් නියමිත වේලාවට ඉදිරිපත් කිරීමට සහ මූල්‍ය විනය පිළිබඳ මූලික ප්‍රමිතීන්ට අනුකූල කිරීමට ඉමහත් පීඩනයක් එල්ල කළේය.
බොහෝ ශ්‍රී ලාංකිකයන්ට, ප්‍රතිපත්තිගරුක දේශපාලනයේ සංකේතයක් ලෙස සුනිල් හඳුන්නෙත්ති පෙනෙන්නට විය. අනුර කුමාර දිසානායක ඇතුළු තම පක්ෂයේ කැපී පෙනෙන චරිත පවා අභිබවා යෑමට ඔහු සමත් විය. සිය විමර්ශනාත්මක වැඩ විලාශය, කරුණු මත පදනම්ව කතා කිරීම, සහ වගවීම සොයා අප්‍රතිහත ලෙස හඹායෑම ඔහුගේ නම කා අතරත් කතා බහට ලක්වීමට හේතුවිය. 2020 මහ මැතිවරණයේ දී සිය පාර්ලිමේන්තු අසුන ඔහුට අහිමිවන විට පවා, බොහෝ දෙනෙකු ඔහුගේ පරාජය ලඝු කරනු ලැබුවේ, දූෂණය හෙළිදරව් කිරීමට ඔහු දැරූ කැපවීම හමුවේ රාජපක්ෂ කඳවුර විසින් ඔහුව දේශපාලනික ඉලක්කයක් බවට පත්කිරීම නිසා එය සිදුවූවක් ලෙසටයි. අවංකව ම සානුකම්පිත ලෙස ඔහු දෙස බැලූ මහජනතාව පවා එවකට විශ්වාස කළේ අසාධාරණ අන්දමින් ඔහුගේ පාර්ලිමේන්තු වරම් අහිමි වූ බවයි.
වසර පහකට පසු..
කෙසේවෙතත්, වසර පහක් ඉදිරියට පැමිණි පසු දක්නට ලැබෙන්නේ හාත්පසින්ම පරස්පර විරෝධී දෙයකි. ආර්ථික සංසදය වැනි කීර්තිමත් වේදිකාවක් මත සුනිල් හඳුන්නෙත්ති දැක් වූ රංගනය හමුවේ රටම තුෂ්නිම්භූත විය. එහෙත් ඒ ඔහුගේ හැකියාවක් නිසා නොව නොහැකියාවක් නිසා ය. එම සංවාදය තුළ ඔහුගේ සූදානම නොමැතිකම, දුර්වල උච්චාරණය, ව්‍යාකූල තර්ක සහ විශේෂයෙන් ඉංග්‍රීසි බස සන්නිවේදනය කිරීමට ඔහු දැරූ අරගලය හමුවේ ඔහු කෙරේ පැවති විශ්වාසනීයත්වය ආපසු හැරවිය නොහැකි ලෙස පරිහානියට පත්විය. ඉකුත් දිනෙක, කර්මාන්ත අමාත්‍යවරයා ලෙස සුනිල් හඳුන්නෙත්ති ශ්‍රී ලංකාවට තේ සඳහා නොබෙල් ත්‍යාගයක් හිමි වූ බව කියමින් විකාරරූපී ප්‍රකාශයක් සිදුකළ අතර, එම ප්‍රකාශය විශාල වශයෙන් විවේචනයට තුඩු දුන්නේය. මහජන අපේක්ෂාවන් ඉහළ මට්ටමක පවතින සහ දේශපාලන නායකයන් නිරන්තරයෙන් පරීක්ෂාවට ලක්වන යුගයක එවැනි හැසිරීමක් හුදෙක් ලැජ්ජාවට පමණක් සීමා නොවූ අතර, එය ඔහු පිළිබඳව ජන විඥාණයේ හැරවුම් ලක්ෂයක් ඇති කළේය.
දේශපාලනික විහිළුවක් බවට පත්වීම
දින කිහිපයක් ඇතුළත ඔහු සමාජ මාධ්‍යවල සහ දේශපාලන කවවල උපහාසයට ලක් වූ චරිතයක් බවට පත්විය. ඔහු ඇසුරින් තැනුනු මීමස් වේගයෙන් සංසරණය වීමට පටන් ගත්තේය. විචාරකයෝ ඔහුව රණසිංහ ප්‍රේමදාස ජනාධිපතිධුරය දැරූ සමයේ හිටපු රාජ්‍ය අමාත්‍යවරයකු වූ ඒ.ජේ. රණසිංහට සමාන කළහ. ඒ.ජේ. රණසිංහ යනු රාජ්‍ය පාලනයට වඩා රංගනයන් හා ප්‍රහසනය වැරදි ලෙස හුවා දැක්වීම සම්බන්ධයෙන් ප්‍රසිද්ධියක් ඉසිලූ තැනැත්තෙකි. හඳුන්නෙත්ති පිළිබඳව, මීට දශකයකට ඉහත පැවති ආකල්පයට වඩා හාත්පසින්ම වෙනස් සංසන්දනයන් ඇතිවන්නට පටන් ගත්තේය. මෙමඟින් හඳුන්නෙත්ති ගේ තත්ත්වය කෙතරම් පහත වැටී ඇත්ද යන්න පිළිබිඹු කරයි. අද වන විට, ඔහු ප්‍රසිද්ධ වේදිකාවට සැපත් වීම ම තවත් උපහාසයක් බවට පත්වීමේ අවදානමක් නිර්මාණය වී ඇත. ඔහු කතා කරන විට, මිනිසුන් අතර අමනාපයක් ඇතිවෙයි. ඔහු විරාමයක් ගන්නා විට, මිනිස්සු ඔහුට වරදිනු ඇතැයි බලාපොරොත්තු වෙති. රජයේ මූල්‍ය විනය විමර්ශනයට ලක්කළ ගෞරවණීය පුද්ගලයකුගේ සිට දේශපාලන උත්ප්‍රාසය ලබා දෙන චරිතයක් බවට හඳුන්නෙත්තිගේ චරිතය පත්වීම ඛේදජනක ය; ම්ලේච්ඡ ය.
මෙම තත්ත්වය ජනතා විමුක්ති පෙරමුණේ / ජාතික ජන බලවේගයේ නායකත්වය පිළිබඳ ව අනතුරු අඟවයි. නිපුණතාවය, විනය සහ වෙනස් ප්‍රවේශයකින් වැඩ කිරීම සම්බන්ධයෙන් පොරොන්දු ලබා දී දැඩි ලෙස උද්ඝෝෂනය කළ ව්‍යාපාරයක නායකයන් ට, මෙවන් සූදානම් නැතිකමක් හෝ බැරෑරුම්බවක් නොමැතිකමක් දරාගත නොහැකි ය. අනුර කුමාර දිසානායක ජනාධිපතිවරයා පවා නොගැළපෙන කතා කීම, ජනතා මතය හා සුසර නොවන මතවාදයන් ඉදිරිපත් කිරීම, සහ කාලානුරූපී නොවන විහිළු සැපයීම සම්බන්ධයෙන් සමාජ මාධ්‍යවල විවේචනයට ලක්වීමට පටන්ගෙන තිබේ. ජාතික ජන බලවේගය තම කාර්යභාරය නිසි පරිදි ඉටු කිරීමට අසමත් වූවහොත්, ගෝඨාභය රාජපක්ෂගේ පාලනයට සිදු වූ සන්තෑසියට ම මුහුණ දීමේ අවදානමක් ඇත; විශ්වාසනීයත්වය අහිමිකර ගැනීමේ අවදනාමක් ඇත; දැවැන්ත මහජන විශ්වාසයකින් බලයට පැමිණ, දුර්වල කාර්යසාධනය සහ සන්නිවේදන අසාර්ථකත්වය නිසා කඩා වැටිය හැකි ය.
පවතින අයහපත් කාලගුණික තත්ත්වය හමුවේ රජය මෙම ආපදාව හසුරුවන ආකාරය පිළිබඳව මහජනතාව ඇස් දල්වාගෙන බලා සිටියි. එසේ තිබිය දී, නොහැකියාව පිළිබඳ චෝදනා දැනටමත් මතුවෙමින් තිබේ. වැඩ කිරීමට නොහැකි නම් බාර දී යන මෙන් සජිත් ප්‍රේමදාස ආණ්ඩුවට පැවසීම තුළින් ද පිලිඹිබු කරන්නේ වත්මන් පාලනය සම්බන්ධයෙන් මහජන විශ්වාසය ගිලිහී යන බවට වූ ප්‍රවණතාවයකි. සුනිල් හඳුන්නෙත්තිගේ කඩාවැටීම හුදෙක් එක් මිනිසකු පිළිබඳ විග්‍රහ නොකරයි. එය සමස්ත ආණ්ඩුවට ම අනතුරු ඇඟවීමකි: නිපුණතාවය විකල්පයක් නොවේ, විශ්වාසනීයත්වය වරක් අහිමි වූ කළ යළි ලබා ගැනීම අතිශයින්ම දුෂ්කර ය.
