ශ්රී ලංකාවට ඖෂධ ආනයනය කිරීම සිදුවන්නේ අමාත්යවරුන් හෝ රජයන් විසින් මත සිදුකරන ක්රියාවක් නොවන බව ශ්රී ලංකා රාජ්ය ඖෂධ නීතිගත සංස්ථාවේ සභාපති ආචාර්ය මනුජ් සී වීරසිංහ මහතා පවසයි.
“ඇමතිවරුන් හෝ රජයන් මත නොවෙයි ඖෂධ ලංකාවට ආනයනය සිද්ධ වෙන්නේ. ඒක ඉතාම පැහැදිලිව තේරුම් ගත යුතුයි.
අමාත්යංශයක් විදියට කාර්ය භාර්යයක් තියෙනවා. අවුරුද්දක් පාසා අවශ්ය වාර්ෂික සැපයුමට අදාළ ටෙන්ඩරය ප්රසම්පාදනය කිරීම සඳහා ඖෂධ සංස්ථාවට ලබාදීම. ඒ අනුව ඒ කර්තව්ය වෙනවා අදාළ ප්රසම්පාදන කමිටු කාර්ය අනුව.
2022 ටෙන්ඩරයක් ගියා, 2025 ටෙන්ඩරයක් ගියා. 2025 ටෙන්ඩරය එන්නේ 2024. 2025ට බෙහෙත් අවශ්ය නම් ඒ ටෙන්ඩර් එක දාන්නේ 2024. අඩුම තරමේ මාස 11ක විතර කාලයක් දැනට යනවා ඕඩර් එකක් දාලා ඖෂධ ටික රටට එන්න. ක්රමවේදය එහෙමයි.
ඕනේ ඕනේ වෙලාට කඩෙන් ගන්නවා වගේ ගන්න බෑ. ඒවා හදන්න ලොකු කාලයක් යනවා. සෞඛ්ය අමාත්යංශයේ කාර්ය භාරයක් විදියටයි යන්නේ. ඉස්සරත් එහෙමයි දැනුත් එහෙමයි”
ශ්රී ලංකා රාජ්ය ඖෂධ නීතිගත සංස්ථාවේ සභාපතිවරයා මේ බව පැවසුවේ ප්රශ්නගත බාල ඖෂධ සිද්ධිය සම්බන්ධයෙන් කරුණු පැහැදිලි කිරීම සඳහා ඊයේ (17) පස්වරුවේ පැවති විශේෂ මාධ්ය හමුවක් අමතමිනි.
එහිදී අදහස් දක්වමින් සෞඛ්ය සේවා අධ්යක්ෂ ජනරාල්, විශේෂඥ වෛද්ය අසේල ගුණවර්ධන මහතා සඳහන් කළේ කොළඹ IDH රෝහලේ රෝගීන් දෙදෙනෙකු මියගියේ ‘ඔන්ඩැන්සෙට්රෝන්’ නමැති එන්නත ලබාදීම හේතුවෙන් ද යන්න සම්බන්ධයෙන් තවමත් නිශ්චිතව තහවුරුකරගැනීමක් සිදුකර නොමැති බවයි.
මේ සම්බන්ධයෙන් සෞඛ්ය අමාත්යංශ විසින් පරීක්ෂණ කණ්ඩමකින් යොදවා වෙනම පරීක්ෂණයක් සිදුකරන බවත්, ජාතික ඖෂධ නියාමන අධිකාරිය විසින්ද පරීක්ෂණයක් සිදුකරන බවත් පැවසූ ඒ මහතා මියගිය රෝගීන් දෙදෙනාගේ පශ්චාත් මරණ පරීක්ෂණයෙන් ලබාගත් සාම්පල මේ වනවිට පරීක්ෂණ තත්ත්වයේ පවතින බවත් සඳහන් කළේය.
