කොළඹ LNW:ඇමරිකාව චීනයේ තායිවාන ප්‍රදේශයට අවි ආයුධ අලෙවි කිරීම තායිවානය මුහුණ දෙන “තර්ජනයට” සහාය වීමක් යැයි ඇමරිකාව කළ ප්‍රකාශයට චීනය ප්‍රතිචාර දක්වා තිබෙනවා.
චීනයේ තායිවාන ප්‍රදේශයට අවි ආයුධ අලෙවි කිරීමේ තීරණයක් ඇමරිකාව පසුගියදා අනුමත කළා. ඇමරිකාව සිදු කළ එම ක්‍රියාව “තායිවානයට ප්‍රමාණවත් ආරක්ෂාව සහතික කරන බවත් තායිවානය මුහුණ දෙන තර්ජනයට සහායක් වන බවත්” මාධ්‍ය වාර්තා කර තිබෙනවා. මේ සම්බන්ධයෙන් චීන විදේශ අමාත්‍යාංශයේ ප්‍රකාශක Guo Jiakun මහතා ඊයේ(19) පැවති මාධ්‍ය හමුවේදී මාධ්‍යවේදියෙකු නැඟූ ප්‍රශ්නයකට පිළිතුරු දෙමින් මෙම අදහස් පළ කළා.
ඇමරිකාව තායිවානයට අවි ආයුධ විශාල ප්‍රමාණයක් අලෙවි කිරීම චීන අභ්‍යන්තර කටයුතු දැඩි ලෙස උල්ලංඝනය කිරීමක් බවයි ඔහු පැවසුවේ. එය චීනයේ ස්වාධිපත්‍යයට හා භෞමික අඛණ්ඩතාවට දැඩි ලෙස හානි සිදු කරන අතර තායිවාන සමුද්‍ර සන්ධි දෙපස සාමය හා ස්ථාවරත්වය ද විනාශ කර තිබෙනවා. එමගින් “තායිවාන බෙදුම්වාදී” බලවේගයන්ට හා ලෝකයට දරුණු මෙන්ම වැරදි සංඥාවක් නිකුත් කෙරෙනවා. චීනය ඊට දැඩි විරෝධය පළ කර ඇති බවද Guo Jiakun මහතා පැවසුවා. එබැවින් ඒ සඳහා සියලු අත්‍යවශ්‍ය පියවර ගන්නා චීනය ජාතික ස්වාධිපත්‍යය හා භෞමික අඛණ්ඩතාව දැඩිව ආරක්ෂා කරනු ඇතැයිද චීන විදේශ අමාත්‍යාංශයේ ප්‍රකාශකයා එහිදී අවධාරණය කළා.
දිනුෂි ධීරසිංහ
