සියලු දෙනාට පිළිගත හැකි සර්ව පාක්ෂික ආණ්ඩුවක් ගොඩනගා ගැනීමට ලැබුණු අනගි අවස්ථාව මේ වන විට මගහැරී ඇති බව ජාතික ජන බලවේගයේ නායක පාර්ලිමේන්තු මන්ත්‍රී අනුර දිසානායක මහතා අවධාරණය කරයි.
ඒ, ඔහු වෙත ජනාධිපතිවරයා විසින් යොමුකර තිබුණු ලිපියට ප්‍රතිචාර වශයෙන් යොමුකර තිබුණු ලිපිය ඔස්සේය.
රට මුහුණ දී තිබෙන ඉතාමත් බරපතළ ආර්ථික,දේශපාලන හා සමාජයීය අර්බුදවලට කෙටිකාලීන හෝ විසඳුමක් ඉදිරිපත් කරමින්, ජනතාව විඳින පීඩාවන්ට සහනයක් සලසමින් අන්තර් කාලීන සර්වපාක්ෂික වැඩපිළිවෙළකට යාමට අවංක වුවමනාවක් තිබුණි නම්, එම අවස්ථාව වූයේ හිටපු ජනාධිපති ගෝඨාභය රාජපක්‍ෂ ජනාධිපති ධුරයෙන් ඉවත් වන බව ප්‍රකාශ කරමින් රටින් පිටවීමෙන් පසුව ඔහු ජනාධිපති ධුරයෙන් ඉවත් වීමත් සමග මතුවූ අවස්ථාව බවයි දිසානායක මහතා සඳහන් කරන්නේ.
ජාතික ජන බලවේගයේ නායක පාර්ලිමේන්තු මන්ත්‍රී අනුර දිසානායක මහතා විසින් ජනාධිපතිවරයා වෙත යොමුකරන ලද ලිපිය
“ජනාධිපතිතුමා,
ජනාධිපති ලේකම් කාර්යාලය,
කොළඹ.
ආර්ථික හා සමාජයීය ස්ථාවරත්වය ඇති කිරීම සඳහා වන ජාතික සර්වපාක්ෂික වැඩපිළිවෙළක් ක්‍රියාත්මක කිරීම
උක්ත කරුණ සම්බන්ධයෙන් ඔබතුමා විසින් මා වෙත එවන ලද ඔබේ අංක PS/DCA/03/02 දරන 2022 අගෝස්තු 04 දිනැති ලිපිය හා බැඳේ.
ඉහත ලිපිය මගින් ඔබ විසින් සර්වපාක්ෂික ආණ්ඩුවක් පිහිටුවා ගැනීම පිළිබඳව සාකච්ඡාවක් සඳහා අප පක්‍ෂයට ආරාධනා කර තිබුණි. රට මුහුණ දී තිබෙන ඉතාමත් බරපතළ ආර්ථික, දේශපාලන හා සමාජයීය අර්බුදවලට කෙටිකාලීන හෝ විසඳුමක් ඉදිරිපත් කරමින්, ජනතාව විඳින පීඩාවන්ට සහනයක් සලසමින් අන්තර් කාලීන සර්වපාක්ෂික වැඩපිළිවෙළකට යාමට අවංක වුවමනාවක් තිබුණි නම්, එම අවස්ථාව වූයේ හිටපු ජනාධිපති ගෝඨාභය රාජපක්‍ෂ ජනාධිපති ධුරයෙන් ඉවත් වන බව ප්‍රකාශ කරමින් රටින් පිටවීමත් පසුව ඔහු ජනාධිපති ධුරයෙන් ඉවත් වීමත් සමග මතුවූ අවස්ථාවයි. එම කාටත් පිළිගත හැකි කාගේත් එකඟතාවයෙන් සර්ව පාක්ෂික ආණ්ඩුවක් ගොඩනගා ගැනීමට ලැබුණු අනගි අවස්ථාව මේ වන විට මගහැරී ඇති බව අපගේ විශ්වාසයයි.
එහිදී අප ජාතික ජන බලවේගය ලෙස සර්වපාක්ෂික ආණ්ඩුවක් සඳහා වූ යථාර්ථවාදී යෝජනාවක් ඉදිරිපත් කොට පාර්ලිමේන්තුව නියෝජනය කරන සියලුම පක්‍ෂ සමග සාකච්ඡාද කළෙමු. එහිදී අපේ යෝජනාව වූයේ මෙසේය.
i. ජනාධිපතිවරයා ඉවත්වීමෙන් හිස්වූ ජනාධිපති ධුරයට අනාගත දේශපාලන බල ව්‍යාපෘතියක් නැති මන්ත්‍රීවරයෙක් ව්‍යවස්ථානුකූලව පාර්ලිමේන්තුවෙන් පත්කර ගැනීම හා අගමැති ධුරය සඳහා පාර්ලිමේන්තුව නියෝජනය කරන පක්‍ෂවල එකඟතාවයෙන් මන්ත්‍රීවරයෙක් පත්කර ගැනීම.
ii. සර්වපාක්ෂික ආණ්ඩුවට සම්බන්ධ වන සියලුම පක්‍ෂ සමාන අයිතීන් ඇති කොටස්කරුවන් ලෙස සලකා එම ආණ්ඩුවේ සියලුම තීන්දු තීරණ ගැනීම හා එම සියලුු පාර්ශ්ව නියෝජනය වන ඉතා කුඩා ඇමති මණ්ඩලයක් පත්කර ගැනීම
iii. එම සර්වපාක්ෂික ආණ්ඩුව අන්තර්කාලීන ආණ්ඩුවක් ලෙස සලකා මාස 06ක් වැනි කෙටි කලකට එම ආණ්ඩුව සීමාකර
ඉන්පසු මහ මැතිවරණයක් පවත්වා නව ජනවරමකින් තමන් කැමති පාලනයක් නිර්මාණය කර ගැනීමට ජනතාවට අවස්ථාව ලබාදීම යන ප්‍රධාන කරුණුය.
යෝජිත සර්වපාක්ෂික ආණ්ඩුවේ කාර්යභාරය වූයේ, රට තුළ පැවති ජනතා අරගලයේ අපේක්‍ෂාවද වූ,
i. ජනතාව මුහුණපා සිටින ආර්ථික දුෂ්කරතාවලට ඉක්මන් සහන ලබාදී රට යළි සාමාන්‍ය තත්වයට පත්කිරීම
ii. ජනාධිපති ධුරයේ බලතල හැකි උපරිමයෙන් අඩු කරන හා ජනතාවගේ ප්‍රජාතන්ත්‍රවාදී අයිතීන් සවිමත් කරන, යහපත් දේශපාලන සංස්කෘතියක් නිර්මාණය කිරීම සඳහා වන යෝජනා සහිත ආාණ්ඩුක්‍රම ව්‍යවස්ථා සංශෝධනයක් සම්මත කර ගැනීම
iii. රට තුළ සිදුකර ඇති වංචා, දූෂණ හා මහජන මුදල් නාස්තියට එරෙහිව ගනු ලබන බලගතු පියවර ලෙස,
■ පසුගිය කාලයේ වංචා-දූෂණවලට එරෙහිව පවරා තිබෙන විවිධ හේතු මත නිදහස් කළ නඩු පිළිබඳ සමාලෝචනයක් සිදුකර අධිකරණ වෙත අභියාචනා කිරීම
■ අල්ලස් හෝ දූෂණ විමර්ෂණ කොමිෂන් සභාව විසින් අතරමගදී විවිධ තාක්‍ෂණික හේතු මත ඉල්ලා අස්කරගත් නඩු යළි පැවරීම
■ වංචා හා දූෂණ පිළිබඳව දැනට විමර්ශන ආයතන වෙත ලැබී තිබෙන හා විමර්ශන පමා කොට හා යටපත් කොට තිබෙන පැමිණිලි පිළිබඳව කඩිනමින් පරීක්ෂණ කර නඩු පැවරීම
■ එසේ වුවද රට මුහුණදී තිබෙන සමාජ ආර්ථික දේශපාලන අර්බුදයන් විසඳීම සඳහා ගැඹුරු ආර්ථික හා දේශපාලන ප්‍රතිසංස්කරණ සිදු කිරීමට අන්තර්කාලීන සර්වපාක්ෂික පාලනයකට හැකියාවක් නොමැති බැවින් ජනතාවගේ අනුමැතිය සහිත ජනවරමක් සඳහා මාස 06ක් වැනි කෙටි කලක් තුළ මහ මැතිවරණයක් පැවැත්වීම
අපගේ මෙම යෝජනාව ඒ මොහොතේ ඉටුකර ගැනීමට නොහැකි වූ අතර ඔබ විසින් පාර්ලිමේන්තුවේ රාජපක්‍ෂවාදී මන්ත්‍රීවරුන් 134 දෙනෙකුගේ ඡන්දයෙන් ජනාධිපති වී රනිල්-රාජපක්‍ෂ ආණ්ඩුවක් පිහිටුවාගනු ලැබීය.
දැන් පවතින්නේ ජනවරමද අහෝසි වූ, ජනතා විරෝධයටද ලක්වූ රනිල්-රාජපක්‍ෂ පාලනයකි. ඔබ ඇතුළු රාජපක්‍ෂ කණ්ඩායම විසින් එම පාලනය පිහිටුවා දැන් සිදුු කරන්නේ එහි කොටස්කරුවන් වන ලෙස අප පක්‍ෂයට ආරාධනා කිරීමයි. එය අවංක ලෙසම සර්වපාක්ෂික වැඩපිළිවෙළක් සඳහා වූ සර්වපාක්ෂික ආණ්ඩුවක් පිහිටුවීමේ වුවමනාවෙන් කරන්නක් නොවන බව ඉතා පැහැදිලිය. අවම වශයෙන් දැනට ඔබ පිහිටුවා තිබෙන පාලනය කෙතරම් කලකට වලංගුද යන්නද පවා ඔබේ පාර්ශ්වයෙන් පැහැදිලි කර නැත.
මේ අනුව සර්වපාක්ෂික ආණ්ඩුවක් ගැන කතා කිරීම තවදුරටත් යථාර්ථවාදී නොවන පලරහිත ප්‍රයත්නයකි.
එහෙයින් දැනට පිහිටුවා තිබෙන, ඔබේ හා රාජපක්‍ෂවරුන්ගේ ආණ්ඩුවේ කොටස්කරුවන් වීම පල රහිත බව අපි දැඩිව අවධාරණය කරමු.
කෙසේ වෙතත් අපේ රටත් ජනතාවත් මුහුණදී සිටින මෙම අර්බුදයෙන් මිදීම සඳහා කිසියම් හෝ පිළිගත හැකි යථාර්ථවාදී වැඩපිළිවෙළක් නිශ්චිත කාල රාමුවක්ද සහිතව ඔබ විසින් ඉදිරිපත් කරන්නේ නම් ජනතාවගේ පැත්තේ සිට ඊට සාධනීය ප්‍රතිචාර දැක්වීමට අප සූදානම්ය.
අනෙක් අතට සර්වපාක්ෂික ආණ්ඩුවක් සඳහා විපක්‍ෂයේ පක්‍ෂවලට ආරාධනා කරන ඔබ ඒ සමඟම රට තුළ හදිසි නීතිය පවත්වාගෙන යමින්, ව්‍යවස්ථාවෙන්ම තහවුරු කර ඇති උද්ඝෝෂණය කිරීමේ අයිතිය පැහැර ගැනීමට අධිකරණ නියෝග ලබා ගැනීමට උත්සාහ කරමින්, පසුගිය කාලයේ සමකාමී අරගලයේ නිරත වූ එහි නායකයින් හා ක්‍රියාධරයන් අත්අඩංගුවට ගනිමින් මර්දනකාරීත්වයක් රට තුළ ක්‍රියාවට නංවා තිබේ. එවැනි මර්දනකාරිත්වයකට අපි සම්පූර්ණයෙන්ම විරුද්ධ බවද අමතර කරුණක් ලෙස සඳහන් කරමු.
අවසාන වශයෙන් ‘සර්වපාක්ෂික’ හෝ ‘බහු පාක්ෂික’ හෝ නාමකරණ යටතේ වත්මන් පාර්ලිමේන්තුව තුළින් පිහිටුවා ගනු ලබන ආණ්ඩුවකට දිගුකලක් රට පාලනය කිරීමට ජනවරමක් හෝ සදාචාරමය අයිතියක් නොමැති බවත් මේ රට ඇද වට්ටවා ඇති වර්තමාන අර්බුදයට ස්ථිරසාර හා දිගුකාලීන විසඳුම් ලබාදීමට සමත් නව පාලනයක් බිහිකර ගැනීම සඳහා කඩිනම් මහ මැතිවරණයක් පවත්වා නව ජනවරමකට අවස්ථාව ලබාදිය යුතු බවත් දැඩිව අවධාරණය කරමු.
ස්තුතියි,
මෙයට,
අනුර දිසානායක
නායක, ජාතික ජන බලවේගය
ASK
