ත්‍රස්තවාදය වැළැක්වීමේ පනත යටතේ දින 90 ක රැඳවුම් නියෝග යටතේ රඳවාගෙන ප්‍රශ්න කරමින් සිටින, අන්තර් විශ්වවිද්‍යාලයීය බලමණ්ඩලයේ කැඳවුම්කරු වසන්ත මුදලිගේ මහතා ඇතුළු තිදෙනා වෙනුවෙන් ශ්‍රේෂ්ඨාධිකරණය හමුවේ පෙත්සම් 03 ක් ගොනු කරන බව ඔවුන්ගේ නීතිඥයන් ප්‍රකාශ කරනවා.
නීතිඥ නුවන් බෝපගේ මහතා මාධ්‍ය වෙත ප්‍රකාශ කර තිබෙන්නේ අධිකරණය මගින් යම් සහනයක් ලබා ගැනීමේ අරමුණින් මෙම පෙත්සම් ගොනු කිරීමට තීරණය කළ බවයි.
පසුගියදා කොළඹදී පැවති උද්ගෝෂණයක් අතරතුරු මෙම තිදෙනා අත්අඩංගුවට ගත් අතර රැඳවුම් නියෝග යටතේ ඔවුන් රඳවාගෙන සිටීම සම්බන්ධයෙන් දේශීය වශයෙන්ම විදේශීය වශයෙන්ද ආණ්ඩුවට විරෝධය එල්ල වී තිබේ. ඔවුන් රඳවාගෙන ප්‍රශ්න කිරීමේ නියෝගය සඳහා ආරක්ෂක ලේකම්වරයා ලෙස ජනාධිපතිවරයා අත්සන් තැබූයේ එල්ල වූ දැඩි විරෝධය නොතකායි.
UN
