රෂිකා හෙන්නායක මැයි 07, කොළඹ LNW :
ශ්‍රී ලංකන් ගුවන් සමාගමේ හිටපු ප්‍රධාන විධායක නිලධාරී කපිල චන්ද්‍රසේන මහතා අත්අඩංගුවට ගැනීම සඳහා කොළඹ ප්‍රධාන මහේස්ත්‍රාත්වරයා විසින් අත්අඩංගුවට ගැනීමේ වරෙන්තුවක් නිකුත් කර ඇත.
මෙම නියෝගයට හේතු වී ඇත්තේ ඔහු ඇපමත නිදහස් කිරීමේදී නුසුදුසු පුද්ගලයන් ඇපකරුවන් ලෙස ඉදිරිපත් කරමින් අධිකරණය නොමඟ යවා ඇති බවට අනාවරණය වීමයි.
මේ සම්බන්ධයෙන් සිදුකළ විමර්ශනවලදී හෙළි වී ඇත්තේ, කිසිදු පෞද්ගලික හඳුනාගැනීමක් නොමැති පුද්ගලයන් දෙදෙනෙකුට මුදල් ලබා දී ඔවුන් ඇපකරුවන් ලෙස ඉදිරිපත් කර ඇති බවයි.
අදාළ ඇපකරුවන් දෙදෙනා දැනටමත් අත්අඩංගුවට ගෙන රක්ෂිත බන්ධනාගාරගත කර ඇති අතර, ඔවුන්ගේ ස්ථිර රැකියාවක් නොමැති වීම සහ ඇප කොන්දේසි සපුරාලීමට ඇති නොහැකියාව පිළිබඳව පොලිසිය කරුණු දක්වා තිබේ.
ගුවන් යානා මිලදී ගැනීමේ සිද්ධියකට අදාළව ඇප ලබා සිටි චන්ද්‍රසේන මහතාගේ ඇප අවලංගු කර ඔහු යළි රිමාන්ඩ් කරන ලෙස අල්ලස් හෝ දූෂණ විමර්ශන කොමිසම අධිකරණයෙන් ඉල්ලා ඇත.
