රෂිකා හෙන්නායක මැයි 19, කොළඹ LNW :
බල්ලෙකුට හිරිහැර කළ බවට චෝදනා එල්ල වී ඇති ප්‍රකාශයක් සම්බන්ධයෙන් හිටපු පාර්ලිමේන්තු මන්ත්‍රීනි හිරුණිකා ප්‍රේමචන්ද්‍ර සහ තවත් වගඋත්තරකරුවෙකුගෙන් රුපියල් බිලියන 1.5 ක වන්දියක් ඉල්ලා හිටපු පාර්ලිමේන්තු මන්ත්‍රී මහාචාර්ය ආශු මාරසිංහ ගොනු කළ අපහාස නඩුව, පාර්ශවයන් අතර සම්මුතියකට පැමිණීමෙන් පසු ඊයේ (19) කඩුවෙල මහේස්ත්‍රාත් අධිකරණය හමුවේ සමථයකට පත් විය.
මුලින් කඩුවෙල දිස්ත්‍රික් අධිකරණයේ ගොනු කර තිබූ නඩුව, දෙපාර්ශ්වය වෙනුවෙන් පෙනී සිටි නීතිඥවරුන්ගේ ඉල්ලීම පරිදි මහේස්ත්‍රාත් අධිකරණයට යොමු කර තිබුණි. මෙම කාරණය කඩුවෙල මහේස්ත්‍රාත් අරුණ ඉන්ද්‍රජිත් බුද්ධදාස ඉදිරියේ විභාගයට ගැනිණි.
2025 දෙසැම්බර් මාසයේ පැවති මාධ්‍ය හමුවකදී කළ බව කියන ප්‍රකාශ සම්බන්ධයෙන් මහාචාර්ය මාරසිංහ හිරුණිකා ප්‍රේමචන්ද්‍රගෙන් රුපියල් මිලියන 500 ක් සහ අනෙක් වගඋත්තරකරු වන කරදාන ගමරාලලාගේ වනිතා ආදර්ශණී කරදානගෙන් රුපියල් බිලියන 1 ක වන්දියක් ඉල්ලා තිබුණි.
දෙවන වගඋත්තරකරු අධිකරණයේ පෙනී සිටියේ නැත.
අපහාසාත්මක ප්‍රකාශය සම්බන්ධයෙන් හිරුණිකා ප්‍රේමචන්ද්‍ර විවෘත අධිකරණයේදී මහාචාර්ය මාරසිංහගෙන් සමාව අයැදීමෙන් පසුව සමථයකට පත් විය. මාධ්‍ය හමුවේදී ඉදිරිපත් කරන ලද වීඩියෝ පට විකෘති කර ඇති බව ඇය පිළිගත් බව අධිකරණයට දන්වන ලදී.
සමාව අයැදීමෙන් පසුව, දෙපාර්ශ්වය වෙනුවෙන් පෙනී සිටි නීතිඥයින් අධිකරණයට දැනුම් දුන්නේ නඩුව ඉදිරියට ගෙන නොයෑමට එකඟ වූ බවයි.
