සටහන: සශිකලා මධුෂාණි
ජූලි මස 15: ලෝකය(අවුට්බවුන්ඩ් ටුඩේ): හෝර්මුස් සමුද්‍ර සන්ධිය හරහා පවතින ආරක්ෂක අවදානම් සහ වෙළෙඳ ප්‍රවාහනයේ බාධා සැලකිල්ලට ගනිමින්, එක්සත් අරාබි එමීර් රාජ්‍යයේ නැගෙනහිර වෙරළ තීරයේ නව බහුකාර්ය වරායක් සහ කන්ටේනර් පර්යන්තයක් ඉදිකිරීමට සැලසුම් කරමින් සිටින බව Financial Times පුවත්පත වාර්තා කර තිබේ.
වාර්තාවට අනුව, ඩුබායි පදනම් කරගත් ලොව ප්‍රමුඛ වරාය සහ සැපයුම් දාම සමාගමක් වන DP World මෙම ව්‍යාපෘතිය සම්බන්ධයෙන් රජයේ බලධාරීන් සමඟ සාකච්ඡා පවත්වමින් සිටින අතර නව වරාය ඉදිකිරීමට යෝජනා වී ඇත්තේ ඕමාන බොක්කට මුහුණලා පිහිටි ෆුජයිරා ප්‍රදේශයේ වන අතර, එම ප්‍රදේශයේ දැනට පවතින වරායට නව කන්ටේනර් පර්යන්තයක් එක් කිරීමේ සැලැස්මක් ද පවතින බව සඳහන් වේ.
මෙම ව්‍යාපෘතියේ ප්‍රධාන අරමුණ වන්නේ හෝර්මුස් සමුද්‍ර සන්ධිය මත පවතින යැපීම අවම කිරීම සහ ඩුබායිහි ප්‍රධාන වරාය වන ජෙබෙල් අලි වරාය මත ඇති අධික පීඩනය අඩු කිරීමයි. ෆුජයිරා පිහිටා ඇත්තේ හෝර්මුස් සමුද්‍ර සන්ධියෙන් පිටත, ඕමාන බොක්කේ බැවින්, එය කලාපීය වෙළෙඳාම සඳහා ආරක්ෂිත විකල්පයක් ලෙස සැලකේ.
මෑත මාසවල ඇමරිකාව, ඊශ්‍රායලය සහ ඉරානය අතර උත්සන්න වූ ගැටුම් හේතුවෙන් හෝර්මුස් සමුද්‍ර සන්ධිය හරහා නාවික ගමනාගමනයට දැඩි බලපෑම් එල්ල වී තිබේ. ප්‍රහාරවලට ලක්වීමේ අවදානම, නෞකා රක්ෂණ ගාස්තු ඉහළ යාම සහ ආරක්ෂක සීමාවන් හේතුවෙන් බොහෝ නෞකා විකල්ප මාර්ග සොයමින් සිටින බව ජාත්‍යන්තර වාර්තා පෙන්වා දෙයි.
කෙසේ වෙතත්, මෙම ව්‍යාපෘතිය තවමත් සැලසුම් සහ සාකච්ඡා මට්ටමේ පවතින අතර, අවසන් ආයෝජන තීරණය, ව්‍යාපෘතියේ වියදම් සහ ඉදිකිරීම් කාලසටහන මෙතෙක් නිල වශයෙන් ප්‍රකාශයට පත් කර නොමැත.
