සටහන – පුලී
ජූලි 15, LNW (කොළඹ): දිගුකාලීන උණුසුම් කාලගුණය සහ වියළි තත්ත්වය හේතුවෙන් එක්සත් රාජධානියේ ප්‍රදේශ රැසක ලැව්ගිනි තවදුරටත් පැතිර යමින් පවතින අතර, ගිනි නිවන කණ්ඩායම් දැඩි පීඩනයකට මුහුණ දී සිටී. NFCC සභාපති ෆිල් ගැරිගන් සඳහන් කළේ, අඛණ්ඩ උණුසුම සහ වර්ෂාපතනයේ හිඟය නිසා ගින්න පාලනය කිරීම දිනෙන් දින අපහසු වෙමින් පවතින බවයි. මේ වන විටත් රට පුරා සක්‍රීය ලැව්ගිනි තත්ත්වයන් රැසක් වාර්තා වන අතර, ගිනි නිවන භටයෝ විවේකයක් නොමැතිව දිවා රෑ මෙහෙයුම්වල නිරත වෙමින් සිටිති.
උතුරු වේල්සයේ කොන්වි සහ ඩර්බිෂයර්හි ග්ලොසොප් ප්‍රදේශවල ප්‍රධාන හදිසි තත්ත්වයන් ප්‍රකාශයට පත් කළද, ඇතැම් ප්‍රදේශවල ගින්න පාලනයට ගෙන ඒමට හැකි වී තිබේ. එසේ වුවද, බෙතෙස්ඩා අසල වන වගා භූමි සහ හාර්ලෙක් ආශ්‍රිත කඳුකර ප්‍රදේශ ඇතුළු ස්ථාන කිහිපයක ගින්න තවමත් සම්පූර්ණයෙන් නිවා දමා නොමැත. හැම්ප්ෂයර්, ඩර්හැම්, ඊස්ට් සහ වෙස්ට් සසෙක්ස්, ඩෙවන් සහ සොමර්සෙට් ඇතුළු ප්‍රදේශවලද පසුගිය දිනවල ලැව්ගිනි හේතුවෙන් හදිසි මෙහෙයුම් ක්‍රියාත්මක කිරීමට සිදුවිය.
මෙම තත්ත්වයට ප්‍රධාන හේතුව වී ඇත්තේ මෑත සතිවල එක්සත් රාජධානිය අත්විඳින අසාමාන්‍ය ලෙස ඉහළ උෂ්ණත්වය සහ දිගුකාලීන වියළි කාලගුණයයි. උෂ්ණත්වය සාමාන්‍ය මට්ටම් ඉක්මවා යෑමත් සමඟ තණබිම්, වනාන්තර සහ පීට් භූමි ඉතා ඉක්මනින් ගිනි ගැනීමට සුදුසු තත්ත්වයකට පත්ව තිබේ. කාලගුණ විද්‍යාඥයන් පෙන්වා දෙන්නේ වර්ෂාව ප්‍රමාද වුවහොත් මෙම අවදානම තවත් වැඩි විය හැකි බවයි.
දේශගුණික විපර්යාසවල බලපෑමත් සමඟ අනාගතයේදී මෙවැනි උණුසුම් තත්ත්වයන් සහ ලැව්ගිනි සිදුවීම් තවත් වැඩි විය හැකි බව විශේෂඥයන් අනතුරු අඟවයි. එවැනි තත්ත්වයන් මඟින් වනජීවී පද්ධති, පරිසරය, ජනතාවගේ සෞඛ්‍යය සහ දේපළවලට දැඩි හානි සිදු කළ හැකි අතර, ගිනි නිවන සේවාවන්ටද පෙර නොවූ විරූ අභියෝග රැසක් එල්ල කරයි.
බලධාරීන් මහජනතාවගෙන් ඉල්ලා සිටින්නේ වියළි තණබිම් හෝ වනාන්තර ආශ්‍රිත ප්‍රදේශවල ගිනි දැල්වීමෙන් වළකින ලෙසත්, සිගරට් කොටස් සහ අනෙකුත් ගිනි ඇවිලවිය හැකි ද්‍රව්‍ය අසල නොතබන ලෙසත්, සැකසහිත ගිනි ගැනීමක් දුටුවහොත් වහාම ගිනි නිවන අංශ වෙත දැනුම් දෙන ලෙසත්ය. කාලගුණය යහපත් වන තුරු සියලු දෙනාගේ වගකීම් සහගත හැසිරීම මෙවැනි විනාශකාරී ලැබීය. ව්‍යාප්තිය අවම කිරීමට ඉතා වැදගත් වනු ඇත.
