රෂිකා හෙන්නායක ජූලි 16, කොළඹ LNW :
දේශගුණික විපර්යාසවලට ඔරොත්තු දෙන පරිසර පද්ධති ශක්තිමත් කිරීම සහ සියලු දෙනා ඇතුළත් වන ධීවර කර්මාන්තය මත පදනම් වූ ආර්ථිකයන් ප්‍රවර්ධනය කිරීම අරමුණු කරගත් ‘Resilient Waves’ (ඔරොත්තු දෙන රැළි) වැඩසටහන, පරිසර අමාත්‍ය ආචාර්ය ධම්මික පටබැඳි සහ බ්‍රිතාන්‍ය මහ කොමසාරිස් ඇන්ඩෲ පැට්‍රික් යන මහත්වරුන්ගේ සහභාගීත්වයෙන් ඊයේ (15) දින දියත් කරන ලදී.
ශ්‍රී ලංකාවේ උතුරු සහ නැගෙනහිර පළාත්වල වඩාත් දුප්පත් ප්‍රදේශ කිහිපයක වෙසෙන අඩු ආදායම්ලාභී ධීවර ප්‍රජාවන් සවිබල ගැන්වීම කෙරෙහි අවධානය යොමු කරමින්, මෙම වැඩසටහන දියත් කිරීමේ උත්සවය බ්‍රිතාන්‍ය මහ කොමසාරිස් කාර්යාලයේදී පැවැත්විණි.
දුප්පත්කම, දේශගුණික විපර්යාසවල බලපෑම් සහ සමාජීය වශයෙන් කොන්වීම වැනි අන්තර් සම්බන්ධිත අභියෝගවලට මුහුණ දීමට මඩකලපු සහ මුලතිව් දිස්ත්‍රික්කවල වෙරළබඩ ප්‍රජාවන්ට උපකාර කිරීම සඳහා මෙම ව්‍යාපෘතිය සැලසුම් කර ඇත.
ප්‍රජාව මූලික කරගත් සහ ස්වභාවධර්මය මත පදනම් වූ විසඳුම් හරහා, දේශගුණික විපර්යාසවලට ඔරොත්තු දෙන පරිසර පද්ධති සංවර්ධනය කිරීම, තිරසාර ජීවනෝපායන් ප්‍රවර්ධනය කිරීම සහ ධීවර ප්‍රජාවන් අතර සහභාගීත්ව පාලන ක්‍රමවේද ශක්තිමත් කිරීම මෙම වැඩසටහනේ අරමුණයි.
අවදානමට ලක්විය හැකි ප්‍රජාවන්ට දේශගුණික විපර්යාසවලට මුහුණ දීමේ හැකියාව වැඩිදියුණු කිරීම සඳහා පරිසර පද්ධති ප්‍රතිෂ්ඨාපනය, ජීවනෝපාය විවිධාංගීකරණය සහ දේශගුණික විපර්යාසවලට අනුගත වන ධීවර ක්‍රමවේදයන්ට මෙම වැඩසටහන සහාය වනු ඇත.
එක්සත් රාජධානියේ පරිසර, ආහාර සහ ග්‍රාමීය කටයුතු දෙපාර්තමේන්තුව (Defra) විසින් OCEAN වැඩසටහන හරහා අරමුදල් සපයනු ලබන මාස 39 ක කාලයක් ක්‍රියාත්මක වන මෙම ව්‍යාපෘතිය, ACTED, Humanity and Inclusion (HI), Biodiversity Sri Lanka (BSL), Green Movement Sri Lanka (GMSL) සහ Blue Resources Trust (BRT) යන ආයතන විසින් ක්‍රියාත්මක කරනු ලබයි.
වාසස්ථාන ඇගයීම්, ප්‍රතිෂ්ඨාපන කටයුතු සහ තිරසාර ධීවර කළමනාකරණය හරහා සමුද්‍රීය පරිසර පද්ධතිවල ඔරොත්තු දීමේ හැකියාව වැඩිදියුණු කිරීම කෙරෙහි මෙම වැඩසටහන අවධානය යොමු කරනු ඇත.
මූල්‍ය සාක්ෂරතා වැඩසටහන් සහ මුහුදු කූඩැල්ලන් හා බෙල්ලන් වගාව වැනි තිරසාර ආදායම් උත්පාදන අවස්ථා හරහා දේශීය ආර්ථිකය තුළ කාන්තා සහභාගීත්වය ඉහළ නැංවීම සඳහා ද විශේෂ අවධානයක් යොමු කෙරෙනු ඇත.
ප්‍රජා හිමිකාරිත්වය ශක්තිමත් කිරීම, දේශීය හැකියාවන් වැඩිදියුණු කිරීම, රාජ්‍ය ආයතන සම්බන්ධ කර ගැනීම සහ ප්‍රජාව මූලික කරගත් සමුද්‍රීය සම්පත් කළමනාකරණය සඳහා පෞද්ගලික අංශයේ සහාය ලබා ගැනීම මගින් මෙම ව්‍යාපෘතිය දිගුකාලීන තිරසාරභාවය ප්‍රවර්ධනය කරනු ඇත.
