සටහන: සශිකලා මධුෂාණි
ජූලි මස 20: ලෝකය(අවුට්බවුන්ඩ් ටුඩේ): නිව්යෝර්ක් නගරාධිපති සොහ්රාන් මම්දානි පවසන්නේ, ඊශ්‍රායල අග්‍රාමාත්‍ය බෙන්ජමින් නෙතන්යාහු එක්සත් ජාතීන්ගේ මහ මණ්ඩල සැසිවාරය සඳහා නිව්යෝර්ක් නගරයට පැමිණියහොත් ඔහු අත්අඩංගුවට ගැනීමට නීතිමය හැකියාවක් තිබේදැයි තම නීති අංශය සමඟ සොයා බලමින් සිටින බවයි.
මම්දානි නෙතන්යාහු “යුද අපරාධකරුවෙකු” ලෙස හඳුන්වා දෙමින්, 2024දී International Criminal Court විසින් නිකුත් කළ අත්අඩංගුවට ගැනීමේ වරෙන්තුව අනුව ඔහු නීතිය ඉදිරියට ගෙන ආ යුතු බව ප්‍රකාශ කර ඇත. කෙසේ වෙතත්, එවැනි පියවරක් ගැනීමට තමන්ට නීතිමය බලයක් ඇත්ද යන්න පිළිබඳව තවදුරටත් නීති උපදෙස් ලබා ගනිමින් සිටින බවද ඔහු සඳහන් කළේය.
කෙසේ නමුත්, එක්සත් ජනපදය ICC හි සාමාජික රටක් නොවන අතර එහි අධිකරණ බලය පිළිගන්නේද නැත. නීති විශේෂඥයන් පෙන්වා දෙන්නේ විදේශ රාජ්‍ය නායකයන්ට අදාළ රාජ්‍ය තාන්ත්‍රික ආරක්ෂාව සහ ෆෙඩරල් නීති හේතුවෙන්, නිව්යෝර්ක් නගරාධිපතිවරයාට තනිවම එවැනි අත්අඩංගුවට ගැනීමක් ක්‍රියාත්මක කිරීම ඉතා සංකීර්ණ සහ නීතිමය අභියෝග සහිත කරුණක් බවයි.
මෙම ප්‍රකාශය සම්බන්ධයෙන් නෙතන්යාහුගේ පාර්ශ්වය දැඩි විවේචන එල්ල කර ඇති අතර, එක්සත් ජාතීන්ගේ සංවිධානයේ ඇමරිකානු තානාපතිවරයා ද මෙය “දේශපාලනික නාට්‍යයක්” ලෙස විස්තර කර තිබේ.
මම්දානි යනු උගන්ඩාවේ උපත ලැබූ, ඉන්දීය සම්භවයක් ඇති, ඇමරිකානු පුරවැසියෙකු ලෙස සැලකේ. ඔහු කුඩා වියේදී පවුල සමඟ ඇමරිකාවට සංක්‍රමණය වී පසුව එක්සත් ජනපද පුරවැසිභාවය ලබා ඇත. ඔහු පලස්තීන ජනතාවගේ අයිතිවාසිකම් සඳහා ප්‍රබලව පෙනී සිටින දේශපාලනඥයෙකු වන අතර, එම ස්ථාවරය නිසා ඊශ්‍රායල රජයේ ප්‍රතිපත්තිවල ප්‍රබල විවේචකයෙකු ද වේ.
