රෂිකා හෙන්නායක අගෝස්තු 24 , කොළඹ LNW :
ශ්‍රී ලංකාවේ ගුවන් භාණ්ඩ ප්‍රවාහන මෙහෙයුම් වඩාත් වේගවත්, කාර්යක්ෂම සහ පාරදෘශ්‍ය කිරීමේ අරමුණින් “ගුවන් භාණ්ඩ ප්‍රවාහන ප්‍රජා පද්ධතියක්” (Air Cargo Community System – ACCS) හඳුන්වා දීමේ නව පියවරක් වරාය හා සිවිල් ගුවන් සේවා අමාත්‍යාංශය විසින් ආරම්භ කර ඇත.
අදාළ පාර්ශ්වකරුවන් අතර සම්බන්ධීකරණය සහ එකඟතාව නොමැතිකම හේතුවෙන් 2023 වසරේදී මෙම පද්ධතිය ක්‍රියාත්මක කිරීමට දැරූ පූර්ව උත්සාහය ඉදිරියට කරගෙන යාමට නොහැකි විය. කෙසේ වෙතත්, ප්‍රධාන රාජ්‍ය ආයතන, කර්මාන්ත සංවිධාන සහ සසුරු වෙනත් ආයතනවල සහභාගීත්වයෙන් මෙම වැඩපිළිවෙළ මේ වන විට නැවත පණගන්වා තිබේ.
මේ සඳහා ගුවන්තොටුපළ සහ ගුවන්සේවා (ශ්‍රී ලංකා) සමාගම, ශ්‍රී ලංකා රේගුව, ශ්‍රී ලංකා ආයෝජන මණ්ඩලය, ශ්‍රීලංකන් ගුවන් සේවය, ඩිජිටල් ආර්ථික අමාත්‍යාංශය, මුදල්, ක්‍රමසම්පාදන සහ ආර්ථික සංවර්ධන අමාත්‍යාංශය, ආනයන හා අපනයන පාලන දෙපාර්තමේන්තුව, ජාතික ශාක නිරෝධායන සේවය, ලංකා වාණිජ මණ්ඩලය සහ ශ්‍රී ලංකා ජාතික අපනයනකරුවන්ගේ මණ්ඩලය යන ආයතනවල නියෝජිතයන්ගෙන් සමන්විත බහු-පාර්ශ්වකාර කමිටුවක් පිහිටුවා ඇත.
මෙම පද්ධතිය හඳුන්වා දීමේ තාක්ෂණික, මුල්‍ය සහ මෙහෙයුම් පැති ආවරණය වන පරිදි කමිටුව විසින් මේ වන විට ශක්‍යතා අධ්‍යයනයක් සිදු කරමින් පවතී.
වරාය හා සිවිල් ගුවන් සේවා නියෝජ්‍ය අමාත්‍ය ජනිත රුවන් කොඩිතුවක්කු මහතාගේ ප්‍රධානත්වයෙන් අගෝස්තු 21 වන දින මෙහි ප්‍රගති සමාලෝචන රැස්වීමක් පැවැත්විණි. අමාත්‍යාංශයේ ලේකම් ඩබ්ලිව්.ඩබ්ලිව්.එස්. මංගල මහතා ඇතුළු සහභාගී වූ ආයතනවල නියෝජිතයෝ ද මෙම රැස්වීමට එක්ව සිටියහ.
යෝජිත පද්ධතිය මගින් ගුවන් භාණ්ඩ නිදහස් කිරීමේදී සිදුවන ප්‍රමාදයන් සහ ලේඛන කටයුතු අවම කිරීම, අදාළ ආයතන අතර තොරතුරු හුවමාරුව වැඩිදියුණු කිරීම සහ ආනයනකරුවන්ට මෙන්ම අපනයනකරුවන්ට වඩාත් කාර්යක්ෂම හා පාරදෘශ්‍ය සේවාවක් සපයනු ඇතැයි අපේක්ෂා කෙරේ.
පවතින ගුවන් භාණ්ඩ ප්‍රවාහන ක්‍රියාවලියේ පවතින බාධාවන් හඳුනා ගැනීම සහ සියලු පාර්ශ්වකරුවන්ගේ සහයෝගීතාවයෙන් ප්‍රායෝගික ඩිජිටල් විසඳුම් සංවර්ධනය කිරීම මෙම වැඩපිළිවෙළෙහි ප්‍රධාන අවධානය යොමු වී ඇති බව අමාත්‍යාංශය සඳහන් කළේය.
