රෂිකා හෙන්නායක සැප්තැම්බර් 14, කොළඹ LNW :
ශ්‍රී ලන්කන් ගුවන් සේවය සඳහා ගුවන් යානා මිලදී ගැනීමේදී සිදුවූ බව කියන මූල්‍ය අක්‍රමිකතා හා සම්බන්ධ මුදල් විශුද්ධිකරණ නඩුවේ සැකකරුවෙකු ලෙස ශ්‍රී ලංකා පොදුජන පෙරමුණේ පාර්ලිමේන්තු මන්ත්‍රී නාමල් රාජපක්ෂ නම් කර තිබේ.
නීතිපතිවරයාගේ උපදෙස් මත අපරාධ පරීක්ෂණ දෙපාර්තමේන්තුව (CID) විසින් අධිකරණය හමුවේ ගොනු කළ මෝසමකට අනුව මෙම පියවර ගෙන ඇත.
නීතිපතිවරයා වෙනුවෙන් පෙනී සිටි අතිරේක සොලිසිටර් ජනරාල් දිලීප පීරිස් මහතා, අදාළ නඩුවේ සැකකරුවෙකු ලෙස නාමල් රාජපක්ෂ නම් කර ඇති බව කොටුව මහේස්ත්‍රාත් අධිකරණයට දැනුම් දුන්නේය.
එයාර්බස් (Airbus) ගුවන් යානා මිලදී ගැනීමේ ගනුදෙනුවට අදාළව අල්ලසක් ලබා ගැනීමේ චෝදනා සම්බන්ධයෙන් අල්ලස් හෝ දූෂණ චෝදනා විමර්ශනය කිරීමේ කොමිෂන් සභාව (CIABOC) විසින් මෑතකදී අත්අඩංගුවට ගනු ලැබූ රාජපක්ෂ මහතා, දැනට සැප්තැම්බර් 18 වන දින දක්වා රක්ෂිත බන්ධනාගාරගත කර සිටී.
නීතිපතිවරයාගේ උපදෙස් සහ අදාළ ගනුදෙනුව සම්බන්ධයෙන් සිදු කරන ලද ඒකාබද්ධ විමර්ශනයක ප්‍රතිඵලයක් ලෙස මෙම නව තත්ත්වය උද්ගත වී ඇති බව අධිකරණයට දැනුම් දෙන ලදී.
මෙම නඩුවට අදාළව නාමල් රාජපක්ෂ මහතාව සැප්තැම්බර් 16 වන දින අධිකරණයට ඉදිරිපත් කරන ලෙස කොටුව මහේස්ත්‍රාත් පාසන් අමරසේන මහතා අද (14) නියෝග කළේය.
