රෂිකා හෙන්නායක සැප්තැම්බර් 16, කොළඹ LNW :
ශ්රී ලංකාවට ඉන්දියාව සපයන සංවර්ධන සහාය මෙහෙයවනු ලබන්නේ පවුලේ සාමාජිකයෙකු කෙරෙහි ඇති වන ආකාරයේ වගකීම් හැඟීමකින් බවත්, ශ්රී ලංකාවේ දීර්ඝකාලීන සංවර්ධනය සහ සමෘද්ධිය උදෙසා සහාය වීමට නව දිල්ලිය කැපවී සිටින බවත් ඉන්දීය මහකොමසාරිස් සන්තෝෂ් ජා මහතා අවධාරණය කළේය.
මන්නාරම දිස්ත්රික් මහ රෝහලේ හදිසි අනතුරු හා ප්රථමාධාර ඒකකය ඉදිකිරීමේ කටයුතු ආරම්භ කිරීමේ උත්සව ඇමතූ ඉන්දීය මහකොමසාරිස්වරයා, දෙරට අතර පවතින සමීප පවුල් සබඳතාව පෙන්වා දුන් අතර, දැනට ශ්රී ලංකාව පුරා ක්රියාත්මක වන ප්රධාන යටිතල පහසුකම්, සෞඛ්ය සංවර්ධන, ප්රවාහන සහ පුනර්ජනනීය බලශක්ති ව්යාපෘති මාලාවක් පිළිබඳවද කරුණු පැහැදිලි කළේය.
ඉන්දීය අග්රාමාත්ය නරේන්ද්ර මෝදි මහතාගේ නායකත්වය යටතේ “සබ්කා සාත්, සබ්කා විකාස්” (සැමගේ සහභාගීත්වයෙන්, සැමගේ සංවර්ධනය) යන ප්රතිපත්තිය පෙරදැරි කරගනිමින් “වික්සිත් භාරත්” (සංවර්ධිත ඉන්දියාව) දැක්ම කරා ඉන්දියාව ගමන් කරමින් සිටින බව ජා මහතා සඳහන් කළේය.
එසේම, ජනාධිපති අනුර කුමාර දිසානායක මහතාගේ නායකත්වය යටතේ ශ්රී ලංකාව ද සිය ජනතාවට උසස් ජීවන තත්ත්වයක් ලබා දෙන සපිරි රටක් බවට පත්වීමේ පරිවර්තනීය ගමනකට අවතීර්ණ වී ඇති බවද ඔහු පැවසීය.
මහකොමසාරිස්වරයාට අනුව, එම දැක්ම යථාර්ථයක් බවට පත් කිරීම සඳහා පසුගිය වසර දෙකක කාලය තුළ ඉන්දියාව සහ ශ්රී ලංකාව සමීපව කටයුතු කරමින් බොහෝ වැඩසටහන් ක්රියාත්මක කර ඇත.
මන්නාරම දිස්ත්රික් මහ රෝහලේ ඉදිකෙරෙන නව හදිසි අනතුරු හා ප්රථමාධාර ඒකකය මඟින්, කාලය ඉතා වැදගත් වන හදිසි අවස්ථාවලදී ප්රදේශයේ ජනතාවට ජීවිත ආරක්ෂක හදිසි ප්රතිකාර සහ දැඩි සත්කාර සේවා ඉක්මනින් ලබා ගැනීමට හැකි වන බව ඔහු පැවසීය.
මනුෂ්ය සංවර්ධනයේ සෑම ක්ෂේත්රයකම ශ්රී ලංකාව සහ උතුරු පළාත සමඟ ඉන්දියාව නිරන්තරයෙන් අත්වැල් බැඳගෙන සිටින බව ජා මහතා අවධාරණය කළේය.
ශ්රී ලංකාවේ උතුරු දුම්රිය මාර්ගයේ වඩාත් වේගවත්, ආරක්ෂිත සහ බාධාවකින් තොර ගමනාගමනයක් සපයනු ඇතැයි අපේක්ෂා කරන ඇමරිකානු ඩොලර් මිලියන 15 ක දුම්රිය සංඥා ව්යාපෘතියක් දැනට ක්රියාත්මක වන බවද ඔහු පෙන්වා දුන්නේය.
දිට්වා සුළි සුළඟින් හානියට පත් වූ මධ්යම පළාතේ දුම්රිය සබඳතා නැවත යථා තත්ත්වයට පත් කිරීමේ කටයුතු ද නුදුරේදීම ආරම්භ කරන බව මහකොමසාරිස්වරයා මෙහිදී නිවේදනය කළේය.
මීට අමතරව, දෙරටේ ජනතාව අතර පවතින සබඳතා තවදුරටත් ශක්තිමත් කිරීම සඳහා ප්රාදේශීය ගුවන් සහ සාගර සබඳතා ව්යාප්ත කිරීමට ද පියවර ගනිමින් සිටින බව ඔහු වැඩිදුරටත් පැවසීය.
ශ්රී ලංකාවේ පුනර්ජනනීය බලශක්ති ක්ෂේත්රය සඳහා ඉන්දියාවේ වර්ධනය වන දායකත්වය කෙරෙහි අවධානය යොමු කළ ජා මහතා, යාපනය අර්ධද්වීපයට ඔබ්බෙන් වූ දූපත් තුනක මිශ්ර පුනර්ජනනීය බලශක්ති පද්ධති ස්ථාපනය කරමින් පවතින බව ප්රකාශ කළේය.
එම දූපත් “හරිත බලශක්ති දූපත්” බවට පරිවර්තනය කිරීමේ ජනාධිපති දිසානායක මහතාගේ දැක්මට මෙම ව්යාපෘතිය ඍජුවම සහාය වන බවද ඔහු සඳහන් කළේය.
ඉන්දියාවේ පුළුල් සංවර්ධන සහාය වැඩසටහන ගැන සඳහන් කරමින් මහකොමසාරිස්වරයා සිහිපත් කළේ, ශ්රී ලංකාවට ලබා දෙන සහාය තමන්ගේම පවුලේ සාමාජිකයෙකු කෙරෙහි යමෙකුට ඇති වන ගැඹුරු යුතුකම සහ වගකීම වැනි හැඟීමකින් යුතුව සිදු කරන ලෙස අග්රාමාත්ය මෝදි මහතා විශ්වාස කරන බවයි.
ඉන්දියාවේ දීර්ඝකාලීන කැපවීම නැවත වරක් තහවුරු කරමින් ජා මහතා පැවසුවේ, දිවයින පුරා සිටින සියලුම ජනකොටස්වල යහපත හා සමෘද්ධිය උදෙසා ශ්රී ලංකා රජය මෙන්ම ජනතාව සමඟද සමීපව කටයුතු කිරීමට නව දිල්ලිය සැමවිටම කැපවී සිටින බවයි.
