රෂිකා හෙන්නායක ඔක්තෝබර් 30, කොළඹ LNW :

ඩකාර් රැලිය 2027: සෞදි අරාබියෙන් ඉවතට – පෘතුගාලය සහ මොරොක්කෝව හරහා නැවතත් අප්‍රිකාවට!

ලොව වඩාත්ම අභියෝගාත්මක මෝටර් රථ තරගාවලිය ලෙස සැලකෙන ඩකාර් රැලිය (Dakar Rally) සෞදි අරාබියෙන් ඉවත් කර වෙනත් රටවල් වෙත ගෙන යාමට සංවිධායකයින් ගත් ක්ෂණික තීරණය මෝටර් රථ ක්‍රීඩා ලෝකය බෙහෙවින් වෙනස් මුහුණූවරක් ගත්හ. මැදපෙරදිග කලාපයේ ඇති වූ හදිසි ආරක්ෂක තත්ත්වයන් සහ ගැටලු හේතුවෙන් මෙලෙස දීර්ඝ කාලීන ක්‍රීඩා සම්ප්‍රදායන් පවා වෙනස් කිරීමට සිදුව තිබේ. මෙම නාටකීය වෙනස්වීමත් සමඟ 2027 ඩකාර් රැලිය පෘතුගාලයෙන් ආරම්භ වී මොරොක්කෝව හරහා ගමන් කිරීමට නියමිතය.

2008න් පසු නැවතත් අප්‍රිකානු මහද්වීපයට

2027 ඩකාර් රැලිය මොරොක්කෝවේ පැවැත්වීමට තීරණය කිරීමත් සමඟ, 2008 වසරෙන් පසුව ප්‍රථම වතාවට මෙම තරගාවලිය නැවතත් අප්‍රිකානු මහද්වීපය වෙත පැමිණෙයි. 1978 වසරේදී පැරිස් නුවර සිට සෙනගාලයේ ඩකාර් අගනුවර දක්වා සහරා කාන්තාරය හරහා පැවැත්වීමෙන් ඇරඹුණු මෙම ඓතිහාසික තරගාවලිය, ආරක්ෂක හේතූන් මත 2008 දී අප්‍රිකාවෙන් ඉවත් විය. පසුව 2009 සිට 2019 දක්වා දකුණු ඇමෙරිකාවේ පැවැත්වුණු අතර, 2020 සිට එය සෞදි අරාබියේ පැවැත්විණි. ඒ අනුව 2027 දී නැවතත් අප්‍රිකාවට පැමිණීම මෝටර් රථ ක්‍රීඩා ලෝලීන්ට එක්තරා ආකාරයක ඓතිහාසික හා හැඟීම්බර අවස්ථාවක් වේ.

මැදපෙරදිග කලාපයේ ඇති වූ ආරක්ෂක ගැටලු හේතුවෙන්, තරග සංවිධායකයින් වන ‘අමෝරි ස්පෝර්ට් ඔර්ගනයිසේෂන්’ (ASO) විසින් 2027 වසරේ සෞදි අරාබියේ සතු වූ සත්කාරක අයිතිය අවලංගු කිරීමට තීරණය කරන ලදී. සෞදි අරාබියේ සත්කාරකත්වය අවලංගු කර දින පහක් වැනි කෙටි කාලයක් තුළ සංවිධායකයින් විසින් පෘතුගාලය සහ මොරොක්කෝව ආවරණය වන නව තරග මාවත ප්‍රකාශයට පත් කිරීම විශේෂත්වයකි. කෙසේ වෙතත්, ASO ආයතනය පෙන්වා දෙන්නේ මෙම ස්ථාන මාරුව “විශේෂිත සහ එක් වරක් පමණක් සිදු වන” වෙනස්කම් කිරීමක් බවයි. 2028 වසරේ පැවැත්වෙන ඓතිහාසික 50 වන ඩකාර් රැලිය සඳහා නැවතත් සෞදි අරාබිය වෙත යාමට සංවිධායකයෝ බලාපොරොත්තු වෙති.

පෘතුගාලයෙන් ඇරඹී මොරොක්කෝවෙන් නිමාවන දැවැන්ත කිලෝමීටර 7,824ක තරග මාවත

සෞදි අරාබියෙන් තරගාවලිය ඉවත් කිරීමට තීරණය කිරීමත් සමඟම, අතිශය කඩිනමින් සංවිධානය කරන ලද නැවත සකස් කළ 49 වන ඩකාර් රැලියේ ගමන් මඟ සහ කාලසටහන නව භූගෝලීය කලාපයන්ට අනුගත වන පරිදි පහත පරිදි සකස් කර ඇත.

• නවතම දින වකවානු: ජාත්‍යන්තර මෝටර් රථ සම්මේලනයේ (FIA) ලෝක මෝටර් රථ ක්‍රීඩා කවුන්සිලයේ අනුමැතියට යටත්ව, තරගාවලිය 2027 ජනවාරි 9 සිට ජනවාරි 23 දක්වා පැවැත්වේ (මුලින් ජනවාරි 1 සිට 15 දක්වා පැවැත්වීමට සැලසුම් කර තිබුණි).
• ආරම්භය: පෘතුගාලයේ අල්ගාර්ව් (Algarve) කලාපයේ ලූලේ-ෆාරෝ (Loule-Faro) හි පැවැත්වෙන ප්‍රොලොග් (Prologue) සහ පළමු තරග අදියරෙන් තරගය ඇරඹේ.
• ප්‍රධාන තරග මාවත: මොරොක්කෝව විසින් උතුරේ සිට අන්ත දකුණ දක්වා මුළු භූමියම ආවරණය වන පරිදි තරග අදියර 11ක් සහ අගාදීර් (Agadir) හි විවේක දිනයක් සත්කාරකත්වය දරන අතර, තරගය මාරකෙෂ් (Marrakesh) හිදී නිමාවට පත්වේ.
• ප්‍රධාන සංඛ්‍යාත්මක දත්ත: සමස්ත තරග මාවත කිලෝමීටර 7,824ක් (හැතැප්ම 4,862ක්) වන අතර, මෙයින් කිලෝමීටර 4,341ක් (හැතැප්ම 2,697ක්) විශේෂ තරග අදියරයන්ගෙන් (special stages) සමන්විත වේ.

ඉතා කෙටි කාලයක් ඇතුළත සමස්ත තරගාවලියක් වෙනත් රටවල් වෙත ගෙනයාම සහ අලුතින් සංවිධානය කිරීම දැවැන්ත ප්‍රවාහන හා සංවිධානාත්මක අභියෝගයක් විය. එසේ වුවද, පවතින දැඩි කාලසීමාවන් හමුවේ වුවද සාර්ථක ලෙස පූර්ණ තරග මාවතක් නිර්මාණය කිරීමට සංවිධායකයින් සමත් වී ඇත.

ඩකාර් රැලියේ අධ්‍යක්ෂ ඩේවිඩ් කැස්ටෙරා (David Castera) ප්‍රකාශ කළේ….

නැවත ස්ථානගත කරන ලද 49 වන ඩකාර් රැලිය, සෑම විටම එය වඩාත්ම අභියෝගාත්මක රැලිය බවට පත් කළ ක්‍රීඩා ප්‍රමිතීන්ට අනුකූල වනු ඇත. කෙටි කාලයක් තුළ අපට වැඩ කිරීමට සිදු වුවද, අපි සැබෑ ඩකාර් රැලියක් නිර්මාණය කර ඇත්තෙමු. ලෙසයි.