රෂිකා හෙන්නායක නොවැම්බර් 01, කොළඹ LNW:
කටුනායක බණ්ඩාරනායක ජාත්‍යන්තර ගුවන්තොටුපළේදී, දළ වශයෙන් රුපියල් මිලියන 49.44ක් වටිනා කොකේන් මත්ද්‍රව්‍ය අඩංගු ගමන් මල්ලක් ලබා ගැනීමට උත්සාහ කළ 64 හැවිරිදි දකුණු කොරියානු ජාතිකයෙකු ගුවන්තොටුපළ පොලිස් මත්ද්‍රව්‍ය නාශක කාර්යාංශයේ නිලධාරීන් විසින් අත්අඩංගුවට ගෙන ඇති බව පොලිසිය පවසයි.
වෘත්තියෙන් වඩු කාර්මිකයෙකු වන මෙම සැකකරු, මත්ද්‍රව්‍ය අඩංගු එම ගමන් මල්ල ලබා ගැනීම සඳහා (නොවැම්බර් 1 ) අද දින පස්වරුවේ ගුවන්තොටුපළ වෙත පැමිණ තිබේ.
ඔහු ඔක්තෝබර් 26 වන දින සෞදි අරාබියේ තබුක් (Tabuk) ගුවන්තොටුපළේ සිට ඩුබායි වෙත පැමිණ, ඉන් අනතුරුව ‘ෆ්ලයි ඩුබායි’ (Flydubai) ගුවන් සේවයට අයත් FZ-579 දරන ගුවන් යානයෙන් ශ්‍රී ලංකාවට පැමිණි බව පොලිසිය සඳහන් කළේය.
කොකේන් අඩංගු මෙම ගමන් මල්ල ඔහු පැමිණි ගුවන් යානයේ පටවා නොතිබූ අතර, පසුව එය වෙනත් ගුවන් යානයකින් කටුනායක ගුවන්තොටුපළ වෙත එවා තිබුණි.
පොලිස්පතිවරයාට ලැබුණු බුද්ධි තොරතුරක් මත මෙම අත්අඩංගුවට ගැනීම සිදු කළ බව පොලිසිය පවසයි.
ගුවන්තොටුපළ පොලිස් මත්ද්‍රව්‍ය නාශක කාර්යාංශය මේ සම්බන්ධයෙන් වැඩිදුර විමර්ශන සිදු කරයි.
