සටහන: සශිකලා මධුෂාණී
ලෝකය(අවුට්බවුන්ඩ් ටුඩේ) නොවැම්බර් 07: මැලේසියාවේ හිටපු අග්‍රාමාත්‍ය නජීබ් රසාක්ට (Najib Razak) ඉතිරි සිරදඬුවම් කාලය නිවාස අඩස්සියේ ගත කිරීමට ලබාදී තිබූ අවසරය ක්‍රියාත්මක කිරීම තාවකාලිකව අත්හිටුවීමට එරට නීතිපති කාර්යාලය පියවර ගෙන තිබේ.
නජීබ්ට නිවාස අඩස්සියේ සිටීමට අදාළ කොන්දේසියක් ලෙස නියම කර තිබූ මැලේසියානු රිංගිට් මිලියන 50ක (ඇමෙරිකානු ඩොලර් මිලියන 12.3ක පමණ) දඩ මුදල ඔහුගේ දේශපාලන පක්ෂය වන එක්සත් මැලේ ජාතික සංවිධානය (UMNO) විසින් මහජන මුදල් එකතු කිරීමේ වැඩසටහනක් හරහා සම්පූර්ණ කර ගෙවා තිබුණි.
ඒ අනුව අධිකරණය විසින් ඔහු නිවාස අඩස්සියට මාරු කිරීමට අදාළ නියෝගයක් ලබාදී තිබූ නමුත්, රාජකීය සමාවට අදාළ නීතිමය කරුණු තවදුරටත් පැහැදිලි කරගත යුතු බව පවසමින් නීතිපති කාර්යාලය එම ක්‍රියාවලිය තාවකාලිකව අත්හිටුවා තිබේ.
නජීබ් රසාක් 2009 සිට 2018 දක්වා මැලේසියාවේ අග්‍රාමාත්‍යවරයා ලෙස කටයුතු කළ අතර, රාජ්‍ය ආයෝජන අරමුදලක් වන 1MDB සම්බන්ධ මූල්‍ය වංචා නඩුවකට අදාළව 2022 වසරේ සිට සිරගතව සිටියි.
2024 වසරේදී ඔහුගේ වසර 12ක සිරදඬුවම වසර හයකට අඩු කර තිබූ අතර, පසුව ලබාදුන් කොන්දේසි සහිත රාජකීය සමාව යටතේ ඉතිරි දඬුවම් කාලය නිවාස අඩස්සියේ ගත කිරීමට අවසර හිමිව තිබුණි.
කෙසේ වෙතත්, 1MDB මූල්‍ය වංචාවට අදාළ තවත් වෙනම නඩුවකින් 2025 දෙසැම්බර් මාසයේදී ඔහුට වසර 15ක සිරදඬුවමක් ද නියම කර තිබූ අතර එම දඬුවම සම්බන්ධයෙන් ඔහු අභියාචනයක් ඉදිරිපත් කර ඇත.
