රෂිකා හෙන්නායක නොවැම්බර් 09, කොළඹ LNW:
පසුගියදා හිටපු ජනාධිපති ගෝඨාභය රාජපක්ෂ මහතා මධ්‍යම අපරාධ විමර්ශන කාර්යංශය වෙත පැමිණියේ විශේෂ ප්‍රකාශයක් ලබා දීම සඳහාය.
ඒ, එම ඒකකය විසින් කළ නිල කැඳවීමකට අනුවය.
මෙම පරීක්ෂණ පවත්වනු ලබන්නේ නව ජනතා පෙරමුණේ නායක මෙන්ම හිටපු ජනාධිපතිවරයාගේ පෞද්ගලික ලේකම්වරයාද වූ සුගීෂ්වර බණ්ඩාර සම්බන්ධයෙන් මතුව ඇති චෝදනා ගැනය.
රජයේ ආයතන දෙකකින් එකවර වැටුප් ලබා ගනිමින් රාජ්‍ය මුදල් අයථා ලෙස භාවිත කළ බවට එල්ල වී ඇති චෝදනා මත ඔහු මේ වන විට රක්ෂිත බන්ධනාගාරගත කර සිටියි.
එම සිද්ධියට අදාළ පුළුල් විමර්ශන කටයුතුවලට සහාය වීම පිණිස ගෝඨාභය රාජපක්ෂ මහතාගෙන් මෙලෙස ප්‍රකාශයක් සටහන් කරගෙන ඇත.
