රෂිකා හෙන්නායක නොවැම්බර් 09, කොළඹ LNW:
මෙම වසරේ මේ දක්වා ශ්‍රී ලංකාව තුළ ඩෙංගු රෝගීන් 107,651 දෙනෙකු වාර්තා වී තිබේ.
ඉන් රෝගීන් 1,399 දෙනෙකු නොවැම්බර් මාසයේ පළමු දින හත තුළ පමණක් වාර්තා වී ඇත.
ජූලි මාසයේදී වැඩිම මාසික ඩෙංගු රෝගීන් සංඛ්‍යාවක් වාර්තා වූ අතර, එම සංඛ්‍යාව 29,964 කි.
ගම්පහ, කොළඹ සහ මහනුවර දිස්ත්‍රික්කවලින් වැඩිම රෝගීන් සංඛ්‍යාවක් වාර්තා වී තිබේ.
මේ අතර, සෞඛ්‍ය වෛද්‍ය නිලධාරී (MOH) කොට්ඨාස 37ක් දැනට ඉහළ අවදානම් සහිත ප්‍රදේශ ලෙස හඳුනාගෙන ඇත.
මෙම වසරේ මේ දක්වා ඩෙංගු රෝගය හේතුවෙන් මරණ 81ක් වාර්තා වී තිබේ.
පවතින තත්ත්වය සැලකිල්ලට ගනිමින්, අද (07) සිට විශේෂ මදුරු මර්දන වැඩසටහනක් ක්‍රියාත්මක කරන බව ජාතික ඩෙංගු මර්දන ඒකකයේ වැඩබලන අධ්‍යක්ෂ වෛද්‍ය කපිල කන්නන්ගර මහතා පැවසීය.
සෞඛ්‍ය වෛද්‍ය නිලධාරී කොට්ඨාස 130ක් පමණ තුළ මදුරු කීට ඝනත්වය වේගයෙන් ඉහළ යමින් පවතින බව ද ඔහු සඳහන් කළේය.
