තුර්කියේ ශ්‍රී ලංකා තානාපතිනි හසන්ති දිසානායක මහත්මිය පවසන්නේ තුර්කියේ වෙසෙන ශ්‍රී ලාංකිකයින් සම්බන්ධයෙන් යම් ගැටලුවක් පවතීනම් ඒ පිළිබඳව මෙරට විදේශ කටයුතු අමාත්‍යංශයේ කන්සියුලර් අංශය වෙත වහාම දැනුවත් කරන ලෙසයි. ඇය සඳහන් කළේ, තුර්කියේ ශ්‍රී ලංකා තානාපති කාර්යාලයට ද ඒ පිළිබඳ තොරතුරු ලබාදිය හැකි බවය.
තුර්කිය තුළ ශ්‍රී ලාංකිකයින් 270 දෙනෙකු පමණ රැඳී සිටින බවට තොරතුරු ලැබී තිබෙන අතර තානාපති කාර්යාලය හරහා ලියාපදිංචි වී ඇති පුද්ගලයින් පිළිබඳ මේ වන විට සොයාබැලීම් සිදුකරන අතර ආපදාවට ලක්වූ ප්‍රදේශයේ සිටි එක් අයෙකු පිළිබඳව පමණක් මෙතෙක් තොරතුරක් ලැබී නොමැති බව තානාපතිවරිය සඳහන් කළාය. එම ප්‍රදේශයේ සිටි සෙසු 13 දෙනෙකු නිරුපද්‍රිතව සිටින බවට තහවුරු වී තිබෙන බව පවසයි.
රෂිකා හෙන්නායක
