රාජ්‍ය නිලධාරීන් දේශපාලන නායකයන්ගේ වුවමනා ඉටු නොකර ආණ්ඩුක්‍රම ව්‍යවස්ථාවට අනුකූලව ජන්දය පැවැත්වීම සඳහා අවශ්‍ය සහය ලබාගැනීම වෙනුවෙන් ශ්‍රේෂ්ඨාධිකරණයෙන් නියෝගයක් ලබා ගැනීමට බලාපොරොත්තු වන බව කොළඹ පුරපති අපේක්ෂක මුජිබර් රහුමාන් මහතා අද (15) සමඟි ජන බලවේගය කාර්යාලයේදී පැවති මාධ්‍ය හමුවේදී පැවසුවේය.
ඊට අදාළව තමන් ශ්‍රේෂ්ඨාධිකරණයේ නඩුවක් පවරා තිබෙන අතර එය හෙට දින විභාගයට ගැනෙන බවයි රහුමාන් මහතා සඳහන් කළේ.
පළාත් පාලන මැතිවරණය පැවැත්වීම සඳහා කටයුතු ආරම්භ කළ මොහොතේ සිට ජනාධිපතිතුමා ප්‍රමුඛ කැබිනට් මණ්ඩලය ඇතුළු මැති ඇමතිවරු එය කඩාකප්පල් කිරීමට නොයෙක් උත්සාහයන් දැරූ අතර මේ වන විට ජන්ද පත්‍රිකා මුද්‍රණය නොකරන තැනට පත්ව තිබෙන බවයි ඔහු පෙන්වාදුන්නේ.
විශේෂයෙන් රාජ්‍ය නිලධාරීන් ආණ්ඩුක්‍රම ව්‍යවස්ථාවට බැඳී සිටින හෙයින් ඒ අනුව ක්‍රියා කළ යුතු වන බවයි රහුමාන් මහතා කියා සිටියේ.
ඒ අනුව ශ්‍රේෂ්ඨාධිකරණයෙන් ධනාත්මක තීන්දුවක් ලැබෙනු ඇති බවයි ඔහු සඳහන් කළේ.
ආශිකා බ්‍රාහ්මණ
