ඊයේ(19) දිනයේදී මියුනිච්හි පැවැති ආරක්ෂක සමුළුවකදී යුක්රේන යුද්ධය සඳහා රුසියාවට ආයුධ සහ පතොරම් ලබාදීමට චීනය සලකා බලමින් සිටින බව එක්සත් ජනපද රාජ්‍ය ලේකම් ඇන්ටනි බ්ලින්කන් මහතා ප්‍රකාශ කර තිබේ.
මෙම ආරක්ෂක සමුළුව සඳහා චීනයේ විදේශ අමාත්‍ය වැන්ග් යී මහතා ද සම්බන්ධව සිටි අතර එක්සත් ජනපද රාජ්‍ය ලේකම් දිගින් දිගටම ප්‍රකාශ කර තිබුණේ, චීනය යම් හෙයකින් යුක්රේන යුද්ධයේදී රුසියාවට මිලීටරි සහය ලබා දෙන්නේ නම් චීනයට බරපතල ප්‍රතිවාපාක විඳින්නට සිදුවන බවයි.
මේ වන විට රුසියාවේ ආර්ථිකය අඩපණ කිරීම සඳහා නිර්මාණය කර ඇති බටහිර සම්බාධක මග හැරීමට චීනය රුසියාවට උදව් කිරීම ගැන එක්සත් ජනපදය කනස්සල්ලට පත්ව සිටින බව බ්ලින්කන් මහතා පැවසීය. රුසියාව සමඟ චීනයේ වෙළඳාම වර්ධනය වෙමින් පවතින අතර එය රුසියානු තෙල්, ගෑස් සහ ගල් අඟුරු සඳහා විශාලතම වෙලඳපොලවලින් එකකි.
ඉදිරි මාසවල ක්‍රියාත්මක කිරීමට අපේක්ෂිත මෙහෙයුම් වෙනුවෙන් එක්සත් ජනපදය ඇතුළු නේටෝ සාමාජිකයින් යුක්රේනයට යුද ටැංකි ඇතුළු විවිධ අවි ආයුධ, පතොරම් සහ උපකරණ යවමින් සිටිති. මෙහිදී චීනයයේ ප්‍රතිපත්තිය නිහඬ එකකි.
චීන ජනාධිපති ෂී ජින්පින් රුසියානු ජනාධිපති ව්ලැඩිමීර් පුටින්ගේ මිත්‍රයෙකු වන අතර තවමත් රුසියාවේ ආක්‍රමණය හෙළා දැක නැත. චීනයේ විදේශ අමාත්‍යවරයා ප්‍රකාශ කර තිබුණේ රුසියාව සමඟ ඇති සබඳතා සම්බන්ධයෙන් එක්සත් ජනපදයෙන් කරනු ලබන චෝදනා එකහෙළාම ප්‍රතික්ෂප කරන බවයි.
සශිකලා මධුෂාණී_
