පාර්ලිමේන්තු මුදල් කමිටුවේ සභාපතිවරයා ලෙස විපක්ෂය විසින් ආචාර්ය හර්ෂ ද සිල්වා මහතාගේ නම යෝජනා කර තිබිය දී තේරීම් කාරක සභාව එම තීන්දුව ගැනීම කල් දැමීම සහ තේරීම් කාරක සභාව නොපැවැත්වීමත් නිසා අනීතික සභාපතිවරුන් පත් කර ඇති බවත් එය ව්‍යවස්ථා විරෝධි ස්ථාවර නියෝග කඩකරන ක්‍රියාවක් බවත් එවැනි තාවකාලික සභාපතිවරයකු හරහා විවිධ රෙගුලාසි අනුමත කිරිම සදාචාර සම්පන්න හෝ ව්‍යවස්ථාවට අනුකූල නොවන බවත් විපක්ෂ නායක සජිත් ප්‍රේමදාස මහතා පාර්ලිමේන්තුවේ දී පැවසීය.
බංකොලොත් රටක මූල්‍ය ප්‍රශ්න සාකච්ඡා කිරිම රටේ ප්‍රධාන දෙයක් වුවත් මෙහි දී දේශපාලන ගේම් ගසා විපක්ෂය බෙදීමට උත්සාහ කරන බවත් මුදල් කාරක සභාවේ සභාපතිකම ලබා නොදී ආණ්ඩුව මුදලට ඇමතිකම් ලබා දීමේ උත්සාහයක නිරත වන බවත් පැවසූ විපක්ෂ නායකවරයා කියා සිටියේ විපක්ෂයේ කිසිවක් එම ඇමතිකම් ලබා ගැනීමට සූදානම් නොමැති බව යි.
මෙහි දී විපක්ෂ නායක සජිත් ප්‍රේමදාස මහතා අගමැතිවරයාගෙන් ඉල්ලා සිටියේ විපක්ෂය විසින් මුදල් කාරක සභාවට හර්ෂ ද සිල්වා මැතිතුමාගේ නම යෝජනා කර තිබිය දී එම පත් කිරීම සිදු නොකිරීමට හේතු කුමක්ද කියා රටටත් පාර්ලිමේන්තුවටත් පැහැදිලි කරන ලෙස යි.
එසේ ම විධිමත්ව පත් වූ සභාපතිවරයකු නොමැති තැන තාවකාලික සභාපතිවරයකු හරහා නීති රීතී රෙගුලාසි සම්මත කර ගන්නේ කෙසේදැයි ගැටලුවක් පවතින බවත් හර්ෂ ද සිල්වා මහතා හරියට මේ තනතුර කරන නිසා සමහර දේශපාලනඥයන්ට ඊර්ෂයාවක් ඇතිව තිබෙන බවත් විපක්ෂ නායකවරයා තවදුරටත් පැවසීය.
RN
