සටහන – රෂිකා හෙන්නායක
කොළඹ (LNW): පාර්ලිමේන්තු මන්ත්‍රීවරුන් විසින් අධිකරණයට අදාළ කාරණා සම්බන්ධයෙන් සභා ගර්භයේ විවිධ ප්‍රකාශ සිදුකරමින් තම පාර්ලිමේන්තු වරප්‍රසාද අවභාවිතා කිරීමේ ප්‍රවණතාවයක් ගොඩ නැඟෙමින් පවතින බව ශ්‍රී ලංකා නීතීඥ සංගමය (BASL) අවධාරණය කර සිටියි.
නිවේදනයක් නිකුත් කරමින් නීතීඥ සංගමය අවධාරණය කරන්නේ ඉකුත් ජූලි 07 වන දින ආණ්ඩු පක්ෂයේ පාර්ලිමේන්තු මන්ත්‍රී සරත් වීරසේකර මහතා විසින් සිදුකරන ලද ප්‍රකාශයක් රටේ අධිකරණයට සහ සමාජ දේහයට පදනම් විරහිත, නිර්ලජ්ජිත ප්‍රහාරයක් එල්ල කර ඇති බවයි.
නීතීඥ සංගමය වැඩිදුරටත් ඒ පිළිබඳ ප්‍රකාශ කළේ මෙසේය:
“බලවත් ප්‍රජාතන්ත්‍රවාදයක් පැවතීම සඳහා බාහිර බලපෑම්වලින්, තර්ජනවලින් හෝ මැදිහත්වීම්වලින් තොරව අධිකරණයට ස්වාධීනව කටයුතු කිරීමට ඉඩ දිය යුතු බව ශ්‍රී ලංකා නීතීඥ සංගමයේ මතයයි. ජාත්‍යන්තර දෘෂ්ටි කෝණයකින්, අධිකරණයේ ස්වාධීනත්වය පිළිබඳ එක්සත් ජාතීන්ගේ මූලික මූලධර්ම, අන්තර් සම්බන්ධය, අධිකරණයේ ස්වාධීනත්වය රාජ්‍යය විසින් සහතික කළ යුතු අතර එය ආණ්ඩුක්‍රම ව්‍යවස්ථාවෙන් හෝ රටේ නීතියට ඇතුළත් කළ යුතුය.
අධිකරණයේ ස්වාධීනත්වයට ගරු කිරීම සහ ඒවා පිළිපැදීම සියලුම රාජ්‍ය හා අනෙකුත් ආයතනවල යුතුකමකි. අධිකරණය ඔවුන් ඉදිරියේ ඇති කරුණු කාරණා සම්බන්ධයෙන් කරුණු මත පදනම්ව සහ නීතියට අනුකූලව කිසිදු බාධාවකින් තොරව, අනිසි බලපෑම්වලින්, පෙළඹවීම්වලින්, බලපෑම්වලින්, තර්ජනවලින් හෝ ඇඟිලි ගැසීම්වලින් තොරව සෘජුව හෝ වක්‍රව ඕනෑම පාර්ශවයකින් හෝ කිසියම් හේතුවක් නිසා අපක්‍ෂපාතීව කරුණු තීරණය කළ යුතුය.
අධිකරණයේ ස්වාධීනත්වයට ගරු කරන ලෙසත් ඒවා පිළිපදින ලෙසත් රජයෙන් සහ විපක්ෂයෙන් ඉල්ලා සිටින නීතීඥ සංගමය, අධිකරණ ක්‍රියාවලියට එල්ල කරන ඕනෑම මැදිහත්වීමක් භයානක පූර්වාදර්ශයක් සපයන බවත් එය තරයේ හෙළා දැකිය යුතු බවත් සිහිපත් කර සිටියි.
රටපුරා සියලු තොරතුරු දැනගන්න එක්වන්න අපගේ Whatsapp Newsroom වෙත??
