ශ්‍රී ලංකා නිදහස් පක්ෂයේ නව මහලේකම්වරයා වශයෙන් පත් කෙරුණු සරත් ඒකනායක මහතාට එම ධුරයේ කටයුතු කිරීම වළක්වාලමින් පනවා ඇති වාරණ නියෝගය තවදුරටත් දීර්ඝ කිරීමට කොළඹ දිසා අධිකරණය අද (22) නියෝග කළේය.
ඒ, තම පක්ෂ සාමාජිකත්වය සහ මහලේකම් ධුරය අහෝසි කිරීමට පක්ෂ සභාපති මෛත්‍රීපාල සිරිසේන මහතා ගෙන ඇති තීරණයට එරෙහිව දයාසිරි ජයසේකර මහතා ගොනුකර ඇති නඩුව අද කැඳවූ අවස්ථාවේදී ය.
එහිදී මෙම වාරණ නියෝගය දීර්ඝ කිරීමට තමන් විරුද්ධ බව විත්තිකාර මෛත්‍රීපාල සිරිසේන මහතා වෙනුවෙන් පෙනී සිටි ජනාධිපති නීතීඥ ෆයිසර් මුස්තාෆා මහතා අධිකරණයට දැනුම් දුන් අතර අදාළ වාරණ නියෝගය ඔක්තෝබර් 06 වනදා දක්වා දීර්ඝ කිරීමටත් මෙම නඩුවට අදාළ විරෝධතා සහ ප්‍රතිවිරෝධතා මීළඟ නඩු දිනයේ ඉදිරිපත් කරන ලෙසත් විනිසුරු සඳුන් විතාන මහතා නියෝග කළේය.
RN
